ഹോം » വാര്‍ത്ത » 

എം‍.കെ മുനീറിനെതിരായ അഴിമതിക്കേസുകളില്‍ തുടരന്വേഷണത്തിന് ഉത്തരവ്

August 3, 2011

തൃശൂര്‍: മന്ത്രി എം‍.കെ മുനീറിനെതിരായ അഴിമതിക്കേസുകളില്‍ തുടരന്വേഷണം നടത്താന്‍ തൃശൂര്‍ വിജിലന്‍സ് കോടതി ഉത്തരവിട്ടു. മലപ്പുരം മഞ്ചേരി ഡിവിഷനില്‍ രണ്ട് റോഡുകളുടെ നിര്‍മ്മാണത്തില്‍ അഴിമതി നടന്നുവെന്ന് വിജിലന്‍സ് കണ്ടെത്തിയിരുന്നു.

2006ല്‍ പൊതുമരാമത്ത് മന്ത്രിയായിരിക്കേ മഞ്ചേരി ഡിവിഷനിലെ രണ്ടു റോഡുകള്‍ക്കു ടെന്‍ഡര്‍ വിളിക്കാതെ കരാര്‍ നല്‍കിയിരുന്നു. ധനകാര്യ വകുപ്പിന്റെ അംഗീകാരമില്ലാത്ത കരാറായിരുന്നു ഇത്. കരാര്‍ തുക മന്ത്രി നേരിട്ടു കൈമാറിയെന്നും പരാതിയുണ്ടായിരുന്നു.

കഴിഞ്ഞ സര്‍ക്കാരിന്റെ കാലത്താണ് റോഡ് നിര്‍മ്മാണവുമായി ബന്ധപ്പെട്ടുള്ള കേസുകള്‍ വിജിലന്‍സ് അന്വേഷണത്തിന് വിട്ടത്. എട്ട് കേസുകളാണ് വിജിലന്‍സ് അന്വേഷിക്കുന്നത്. ഇതില്‍ രണ്ട് കേസുകളുടെ കുറ്റപത്രം സമര്‍പ്പിച്ചിരുന്നു. ഈ രണ്ട് കേസുകളിലും കഴിഞ്ഞ യു.ഡി.എഫ് സര്‍ക്കാരില്‍ പൊതുമരാമത്ത് മന്ത്രിയായിരുന്ന എം.കെ മുനീര്‍ ഒന്നാം പ്രതിയായിരുന്നു.

സംസ്ഥാനത്ത് ഭരണമാറ്റം ഉണ്ടായ സാഹചര്യത്തില്‍ കേസുകളില്‍ തുടരന്വേഷണം ആവശ്യപ്പെട്ട് വിജിലന്‍സ് ഡി.വൈ.എസ്.പി ജൂണ്‍ 23ന് കോടതിയില്‍ അപേക്ഷ സമര്‍പ്പിക്കുകയുണ്ടായി. ഈ അപേക്ഷ പരിഗണിച്ച ശേഷമാണ് തുടരന്വേഷണത്തിന് കോടതി അനുമതി നല്‍കിയത്.

അഭിപ്രായം രേഖപ്പെടുത്താംമലയാളത്തില്‍ ടൈപ്പ് ചെയ്യാന്‍

വാര്‍ത്ത - പുതിയ വാര്‍ത്തകള്‍
Related News from Archive
Editor's Pick