ന്യൂദല്ഹി: ഭാരതത്തില് നഗരവല്ക്കരണത്തില് ദക്ഷിണേന്ത്യന് സംസ്ഥാനങ്ങളും കേന്ദ്രഭരണപ്രദേശങ്ങളും മുന്നിലെന്ന് കേന്ദ്രസര്ക്കാര്. കേന്ദ്രനഗരവികസന മന്ത്രി വെങ്കയ്യ നായിഡു ലോക്സഭയെ അറിയിച്ചതാണ് ഇക്കാര്യം. 2001-2011 ലെ ദേശീയ ശരാശരിയേക്കാള് വന് വര്ധനവാണ് ഈ കാലഘട്ടത്തില് ഉണ്ടായിരിക്കുന്നത്.
14 ദക്ഷിണേന്ത്യന് സംസ്ഥാനങ്ങളും ആറ് കേന്ദ്രഭരണ പ്രദേശങ്ങളുമാണ് നഗരവല്ക്കരണത്തില് മുന്നിലുള്ളത്. ഇതില് കേരളമാണ് ഒന്നാം സ്ഥാനത്ത്. മറ്റ് സംസ്ഥാനങ്ങളെ അപേക്ഷിച്ച് വന്വര്ധനവ് കേരളത്തിലുണ്ടായി. കേരളത്തിലെ നഗരപ്രദേശങ്ങളിലെ ജനസംഖ്യാവര്ധനവ് 21.70 ശതമാനമാണ്. കേന്ദ്രഭരണപ്രദേശമായ ദല്ഹിയില് 4.3 ശതമാനമാണ് വളര്ച്ച. ജവഹര്ലാല് നെഹ്രു ദേശീയ നഗര നവീകരണ പദ്ധതിപ്രകാരം 6,649 കോടി രൂപ ദല്ഹിക്ക് നല്കിയിരുന്നു.
രാജ്യത്തെ നഗരപ്രദേശങ്ങളിലെ ജനസംഖ്യയില് ആകെ ഉണ്ടായിരിക്കുന്ന ദേശീയ വര്ധനവ് 31.10 ശതമാനമാണ്. 2011-ല് 27.80 ആയിരുന്നു വര്ധനവ്. 2011 മുതല് 2014 വരെയുള്ള കാലയളവില് ജനസംഖ്യയില് 3.30 ശതമാനം വര്ധനവുണ്ടായി.
നഗരങ്ങളില് താമസിക്കുന്ന ജനങ്ങളുടെ എണ്ണം 9 കോടിയായി ഉയര്ന്നു. ഗുജറാത്ത്, ഗോവ, ഹരിയാന, നാഗാലാന്റ്, സിക്കിം, ത്രിപുര എന്നീ സംസ്ഥാനങ്ങള് കൂടാതെ നാല് തെക്കന് സംസ്ഥാനങ്ങളും ആറ് കേന്ദ്രഭരണ പ്രദേശങ്ങളുമാണ് നഗരവല്ക്കരണ വളര്ച്ചയില് മുന്നില്. കേരളം, തമിഴ്നാട്, ആന്ധ്രാപ്രദേശ്, കര്ണാടക എന്നിവയാണ് ഈ നാല് തെക്കന് സംസ്ഥാനങ്ങള്.
ജനസംഖ്യാവര്ധനവില് കേരളമാണ് മുന്നിലെങ്കില് ആന്ധ്രാപ്രദേശാണ് രണ്ടാംസ്ഥാനത്ത്. 6.10 ശതമാനമാണ് ഇവിടുത്തെ ജനസംഖ്യാ വര്ധനവ്. കര്ണാടകയില് 4.70 ശതമാനവും തമിഴ്നാട്ടില് 4.40 ശതമാനവുമാണ് വര്ധന. കേന്ദ്രഭരണ പ്രദേശങ്ങളില് ദാമന് ദിയുവിലാണ് വര്ധന കൂടുതല്. 39 ശതമാനമാണ് ഇവിടുത്തെ മുന്നേറ്റം. തൊട്ടു പിന്നില് ലക്ഷദ്വീപാണ്. 33.60 ആണ് ഇവിടുത്തെ വര്ധനവ്. ദാദ്ര ആന്റ് നാഗര്-ഹവേലിയാണ് മൂന്നാം സ്ഥാനത്ത്. ഇവിടെ ജനസംഖ്യാ വളര്ച്ച 23.80 ശതമാനമാണ്. ചണ്ഡീഗഡില് 7.50 ശതമാനമാണ് വളര്ച്ച. ദല്ഹിയില് 4.30 ശതമാനവും, ആന്റമാന് നിക്കോബാറില് 5.10 ശതമാനവുമാണ് വളര്ച്ച. പോണ്ടിച്ചേരിയാണ് വളര്ച്ചയില് ഏറ്റവും പിന്നില്. 1.70 ശതമാനത്തിന്റെ വളര്ച്ച മാത്രമെ ഈ കാലയളവില് ഇവിടെ ഉണ്ടായിട്ടുള്ളൂ.
നഗരവല്ക്കരണത്തില് വളര്ച്ച രേഖപ്പെടുത്തിയ മറ്റ് സംസ്ഥാനങ്ങള് ഇവയാണ്. ഗോവ(22.40%) സിക്കിം( 14.10 %) നാഗാലാന്റ് (10.70%) ഹരിയാന(6.0%) ഗുജറാത്ത്(5.20%) ഉത്തരാഖണ്ഡ്(4.50%) പശ്ചിമബംഗാള് (3.90%) പഞ്ചാബ്(3.60%)
നഗരവല്ക്കരണത്തില് ദേശീയ ശരാശരിയില് ഏറെ പിന്നിലുള്ള സംസ്ഥാനങ്ങളുമുണ്ട്. ഉത്തര്പ്രദേശ്, ബീഹാര്, ആസാം, രാജസ്ഥാന്, ഒഡീഷ, ഝാര്ഖണ്ഡ്, മഹാരാഷ്ട്ര എന്നിവയാണ് വളര്ച്ചാ നിരക്ക് കുറവുള്ള സംസ്ഥാനങ്ങള്. ഉത്തര്പ്രദേശില് 0.50 ആണ് വളര്ച്ചാ നിരക്ക്. ബീഹാറില് 0.80, ആസാമില് 1.20, രാജസ്ഥാനില് 1.50, ഒഡീഷയില് 1.70 ഝാര്ഖണ്ഡില് 1.80, മഹാരാഷ്ട്രയില് 2.80 എന്നിങ്ങനെയാണ് വളര്ച്ചാ നിരക്ക്. നഗരവല്ക്കരണത്തിനായി ദല്ഹിക്കുവേണ്ടി 23 പദ്ധതികള് നീക്കിവെച്ചിരുന്നതായും വെങ്കയ്യ നായിഡു ലോക്സഭയെ അറിയിച്ചു.
പ്രതികരിക്കാൻ ഇവിടെ എഴുതുക: