കോട്ടയം: തൊഴിലവകാശങ്ങള് കവര്ന്നെടുക്കുന്ന തൊഴില് നിയമഭേദഗതി പിന്വലിക്കണമെന്നതുള്പ്പെടെയുള്ള ആവശ്യങ്ങള് അംഗീകരിക്കണമെന്ന് ആവശ്യപ്പെട്ട് ഡിസംബര് 5ന് നടക്കുന്ന പാര്ലമെന്റ് മാര്ച്ച് വിജയിപ്പിക്കുവാന് സംയുക്ത ട്രേഡ് യൂണിയന് കോട്ടയം ജില്ലാ കണ്വന്ഷന് ആഹ്വാനം ചെയ്തു. നവംബര് 1,3,4 തീയതികളില് നിയോജകമണ്ഡലയോഗങ്ങള് നടക്കും. നവംബര് 15നകം പഞ്ചായത്ത്തല തൊഴിലാളി കണ്വന്ഷനുകളും നടക്കും. ഡിസംബര് 5ന് ഇരുപത്തയ്യായിരം തൊഴിലാളികള് പങ്കെടുക്കുന്ന വന്പിച്ച തൊഴിലാളി റാലി ജില്ലയിലും നടക്കും.
കോട്ടയം സാഹിത്യപ്രവര്ത്തക സഹകരണ സംഘം ഹാളില് നടന്ന കണ്വന്ഷന് ബിഎംഎസ് സംസ്ഥാന പ്രസിഡന്റ് എം.പി. ഭാര്ഗ്ഗവന് ഉത്ഘാടനം ചെയ്തു. സിഐടിയു ജില്ലാ പ്രസിഡന്റ് വി.എന്. വാസവന് അദ്ധ്യക്ഷത വഹിച്ചു. എഐടിയുസി ജില്ലാ സെക്രട്ടറി സന്തോഷ്കുമാര് സ്വാഗതം പറഞ്ഞു. ഐന്ടിയുസി ജില്ലാ പ്രസിഡന്റ് ഫിലിപ്പ് ജോസഫ് തുടങ്ങിയവര് സംസാരിച്ചു. സംയുക്ത ട്രേഡ് യൂണിയന് സമിതി ജില്ലാ കണ്വീനര് വി.പി. കൊച്ചുമോന് ജില്ലയില് നടക്കുന്ന വിപുലമായ പ്രചാരണ പരിപാടികള് വിശദീകരിച്ചു.
വിവിധ യൂണിയനുകളെ പ്രതിനിധീകരിച്ച് വി.ആര്. ഭാസ്കരന്, ടി.ആര്. രഘുനാഥന്, നളിനാക്ഷന് നായര്, അഡ്വ. വി.ബി. ബിനു, കെ.പി. വിജയന്, മുണ്ടക്കയം സോമന്, പി.കെ. ആനന്ദക്കുട്ടന്, സാജു എം. ഫിലിപ്പ്, റ്റോമി മൂലയില്, സ്റ്റീഫന് ചാഴികാടന്, റാസി ചെറുവല്ലം, ടി.ജെ. ഭായ്, കിളിരൂര് രാമചന്ദ്രന്, അനിയന് മാത്യു, സൗദാമിനി തുടങ്ങിയവര് സംസാരിച്ചു.
പ്രതികരിക്കാൻ ഇവിടെ എഴുതുക: