ജീവിതത്തിന്റെ വ്യക്തിപരവും കുടുംബപരവും സാമൂഹ്യപരവുമായ മേഖലകളില് ധര്മ്മത്തിന്റെ ശക്തിയും വിശുദ്ധിയും തേജസ്സും പുനഃസ്ഥാപിക്കണം.
ഇതാണ് ധാര്മ്മികപുനരുജ്ജീവനം. സംശയം, അവിശ്വാസം, നിരാശ ഇവയില്നിന്ന് സര്വ്വശക്തനോടുള്ള സുസ്ഥിരമായ വിശ്വാസത്തിലേക്കും മനുഷ്യജീവിതത്തിന്റെ പവിത്രതയേയും മഹത്വത്തേയുംകുറിച്ചുള്ള ബോധത്തിലേക്ക് നിങ്ങള് മടങ്ങിവരിക. ഇതാണ് ആദ്ധ്യാത്മികമായ പുനരുജ്ജീവനം.
നിങ്ങളുടെ മാനസികവ്യാപാരത്തിലും ജീവിതരീതിയിലും സ്വഭാവത്തിലും ഒരു പരിവര്ത്തനം വന്നേ പറ്റൂ.
ഈശ്വരാനേ്വഷണത്തിന് പ്രാരംഭമായി അനുഷ്ഠിക്കേണ്ടത് ഇതാണ്.
വ്യക്തികളാണു കുടുംബത്തിന്റെ ഘടകങ്ങള്. കുടുംബങ്ങള് സമൂഹത്തിന്റെ തിളങ്ങുന്ന ആഭരണങ്ങളും.
ഈശ്വരനോടും ഈശ്വരനിയമത്തോടുമുള്ള ഭക്തിസംയുക്തമായ ആദ്ധ്യാത്മികബോധമായിരിക്കണം വ്യക്തികളെ നേര്വഴിക്ക് നയിക്കുന്ന ശക്തിവിശേഷം. എങ്കില് മാത്രമേ കുടുംബജീവിതത്തില് അനുരഞ്ജനവും ദാമ്പത്യബന്ധത്തില് സന്തുഷ്ടിയും സാമൂഹ്യസംവിധാനത്തില് ഐക്യബോധവും രാഷ്ട്രത്തിന് സമൃദ്ധിയും കൈവരികയുള്ളൂ.
മനസ്സില്നിന്നു മനുഷ്യര് തമ്മിലുള്ള ബന്ധങ്ങളില്നിന്നും സംഘര്ഷാവസ്ഥയും ക്ഷോഭത്തെയും വൈരത്തേയും അകറ്റുന്നതിന് ഈശ്വരിങ്കല് ദൃഢവിശ്വാസവും ധര്മ്മത്തോട് ആദരവും ഉണ്ടാവുകതന്നെവേണം.എവിടെ സത്ബോധം അല്ലെങ്കില് ശരണാഗതി അല്ലെങ്കില് തീവ്രമായ സാന്മാര്ഗിക നിഷ്ഠ പുലരുന്നുവോ അവിടെ ആദ്ധ്യാത്മിക ശക്തി പ്രകടമാവും.
ഈശ്വരനില് നിങ്ങളുടെ പ്രജ്ഞ പ്രബുദ്ധമാവുമ്പോള് ഈശ്വരമഹിമയിലും ഈശ്വര നിയമത്തിന്റെ പ്രവര്ത്തനങ്ങളിലും നിങ്ങളുടെ കര്മ്മങ്ങള് സ്വാഭാവികമായിത്തന്നെ ധര്മ്മാധിഷ്ഠിതമാകും.
ധര്മ്മത്തിന്റെ പുനരുദ്ധാരണം ആഗോളവ്യാപകമായ ആവശ്യമാണ്. അത് ഈശ്വരകര്മ്മമാണ്. ഈശ്വരനില് നിന്നുള്ള പ്രചോദനംകൊണ്ടാണ് ഋഷികളും താപസന്മാരും ജീവമുക്തരായ ഭക്തന്മാരും ഈശ്വരമഹത്വം പ്രചരിപ്പിക്കുവാനും ദിവ്യജീവിതതത്വങ്ങള് പ്രചരിപ്പിക്കാനുമുള്ള ഉപകരണങ്ങളായി തീരുന്നത്. എന്നാല് ധര്മ്മ സ്ഥാപനമെന്ന മഹത്തായ കര്മ്മം നിര്വഹിക്കുന്നതിനു ഈശ്വരന് തന്നെ സ്വയം മനുഷ്യനായി അവതരിക്കുന്നു.
ശ്രീ രമാദേവി
പ്രതികരിക്കാൻ ഇവിടെ എഴുതുക: