ന്യൂദല്ഹി: ദല്ഹി ഡെയര് ഡെവിള്സിനെതിരായ മത്സരത്തില് കൊല്ക്കത്ത നൈറ്റ് റൈഡേഴ്സിന് വിജയിക്കാന് 147 റണ്സ്. ആദ്യം ബാറ്റ് ചെയ്ത ദല്ഹി ഡെയര് ഡെവിള്സ് 20 ഓവറില് എട്ട്് വിക്കറ്റിന് 146 റണ്സെടുത്തു. മനോജ് തിവാരി (32), ശ്രേയസ് അയ്യര് (31), ആഞ്ചലോ മാത്യൂസ് (30), യുവരാജ് സിംഗ് (22) എന്നിവര് ഭേദപ്പെട്ട പ്രകടനം നടത്തി.
നേരത്തെ ടോസ് ജയിച്ച കൊല്ക്കത്ത നൈറ്റ് റൈഡേഴ്സ് നായകന് ഗൗതം ഗംഭീര് ദല്ഹി ഡെയര് ഡെവിള്സിനെ ബാറ്റിങ്ങിനയക്കുകയായിരുന്നു. ക്യാപ്റ്റന്റെ തീരുമാനത്തെ ന്യായീകരിച്ച് ഉജ്ജ്വലമായി പന്തെറിഞ്ഞ കൊല്ക്കത്ത ബൗളര്മാര് രണ്ടാം ഓവറിലെ രണ്ടാം പന്തില് തന്നെ ദല്ഹിയുടെ ആദ്യ വിക്കറ്റ് പിഴുതു.
മോണെ മോര്ക്കലിന്റെ പന്തില് ഒരു റണ്സെടുത്ത മയാങ്ക് അഗര്വാള് ഉമേഷ് യാദവിന് ക്യാച്ച് നല്കി മടങ്ങുമ്പോള് സ്കോര്ബോര്ഡില് മൂന്ന് റണ്സ് മാത്രമായിരുന്നു ഉണ്ടായിരുന്നത്. തുടര്ന്നെത്തിയ ക്യാപ്റ്റന് ജെ.പി. ഡുമ്നിക്കുംഇന്നലെ കാര്യമായ സംഭാവന നല്കാന് കഴിഞ്ഞില്ല. എട്ട് പന്തില് നിന്ന് അഞ്ച് റണ്സെടുത്ത ഡുമ്നി സുനില് നരേയ്ന്റെ പന്തില് ബൗള്ഡായി മടങ്ങുമ്പോള് ദല്ഹി സ്കോര്ബോര്ഡില് 22 റണ്സായിരുന്നുണ്ടായിരുന്നത്.
പിന്നീട് ശ്രേയസ്സ് അയ്യരും മനോജ് തിവാരിയും ചേര്ന്ന് സ്കോര് മുന്നോട്ടുനിക്കിയെങ്കിലും 58-ല് എത്തിയപ്പോള് മൂന്നാം വിക്കറ്റും വീണു. 24 പന്തില് നിന്ന് 31 റണ്സെടുത്ത ശ്രേയസ്സ് അയ്യരെ പിയൂഷ് ചൗള ബൗള്ഡാക്കി. തുടര്ന്ന് തിവാരിയും യുവരാജുമാണ് രക്ഷാപ്രവര്ത്തനം ഏറ്റെടുത്തത്. എന്നാല് 13.4 ഓവറില് സ്കോര് 95-ല് നില്ക്കേ നാലാം വിക്കറ്റും ഡെയര് ഡെവിള്സിന് നഷ്ടമായി. 28 പന്തില് നിന്ന് 32 റണ്സെടുത്ത മനോജ് തിവാരിയെ മോര്ക്കലിന്റെ പന്തില് യൂസഫ് പഠാന് പിടികൂടി.
14.5 ഓവറിലാണ് ദല്ഹി സ്കോര് 100 കടന്നത്. പിയൂഷ് ചൗളയുടെ പന്ത് മിഡ്വിക്കറ്റ് ബൗണ്ടറിയിലേക്ക് പായിച്ച് യുവരാജാണ് സ്കോര് മൂന്നക്കത്തിലെത്തിച്ചത്. എന്നാല് തൊട്ടടുത്ത പന്തില് യുവിയെ (21) പിയൂഷ് ചൗള മടക്കുകയും ചെയ്തു. വിക്കറ്റ് കീപ്പര് റോബിന് ഉത്തപ്പ് സ്റ്റമ്പ് ചെയ്യുകയായിരുന്നു യുവിയെ.
പിന്നീട് 18 ഓവറില് സ്കോര് 123-ല് എത്തിയപ്പോള് ആറാം വിക്കറ്റും വീണു. 12 റണ്സെടുത്ത കേദാര് ജാദവിനെ ഉമേഷിന്റെ പന്തില് ഗംഭീര് പിടികൂടി. എന്നാല് 19-ാം ഓവര് എറിഞ്ഞ നരേയ്ന്റെ ഓവറില് ആഞ്ചലോ മാത്യൂസ് രണ്ട് സിക്സും ഒരു ഫോറുമടക്കം 20 റണ്സ് അടിച്ചുകൂട്ടി. അവസാന ഓവറിലെ രണ്ടാം പന്തില് കള്ട്ടര് നീല് റണ്ണൗട്ടായി. അവസാന ഓവറിലെ അവസാന പന്തില് മാത്യൂസും മടങ്ങി.
പ്രതികരിക്കാൻ ഇവിടെ എഴുതുക: