ടൂറിന്: ഇറ്റാലിയന് മണ്ണില് വിജയക്കൊടി നാട്ടാന് ചെന്ന നിലവിലെ ചാമ്പ്യന് റയല് മാഡ്രിഡിന്റെ കണ്ണീരോടെ ചാമ്പ്യന്സ് ലീഗ് ഫുട്ബോള് സെമി ഫൈനല് റൗണ്ടിന് തുടക്കം. ആദ്യ പാദത്തില് ടൂറിനിലെ സ്പാനിഷ് വിരുന്നുകാരെ യുവന്റസ് ഒന്നിനെതിരെ രണ്ടു ഗോളുകള്ക്ക് കെട്ടുകെട്ടിച്ചു. അല്വാരോ മൊറാട്ട, കാര്ലോസ് ടെവസ് എന്നിവര് യുവന്റസിന്റെ ഫൈനല് പ്രതീക്ഷകള്ക്ക് നിറംപകര്ന്ന ഗോളുകള്ക്ക് പിറവികൊടുത്തു. സൂപ്പര് താരം ക്രിസ്റ്റ്യാനോ റൊണാള്ഡോ റയലിന് അതിനിര്ണായക എവേ ഗോള് സമ്മാനിച്ചു.
ഗാരെത് ബെയ്ലിന്റെ നിറംമങ്ങല് പിന്നെ ഗോളി ഇകെര് കസിയസിന്റെ പിഴവുകള് റയലിന്റെ തോല്വിയുടെ പ്രധാനകാരണങ്ങള് ഇവയെന്നു പറയാം. മറുവശത്ത് ജിയാന്ലൂഗി ബഫണ് യുവന്റസ് വലയ്ക്കു കഴുകന് കണ്ണുകളുമായി കാവല്നിന്നു. ജോര്ജിയോ ചെല്ലിനിയപ്പോലുള്ള അധ്വാനശീലര് ഉള്പ്പെട്ട പ്രതിരോധനിരയും സീരി എ ചാമ്പ്യന്മാരെ ജയത്തിലേക്ക് എടുത്തുയര്ത്തി.
സ്വന്തം മൈതാനത്തില് തിളക്കമുള്ള തുടക്കം തന്നെ യുവന്റസിന് ലഭിച്ചു. കസിയസിന്റെ ദുര്ബലമായ ക്ലിയറന്സ് അര്ട്ടൂറോ വിദാലിനെ ഗോളിനടുത്തെത്തിച്ചു. മൊറാട്ടയുടെ ലോബിനോടും കസിയസിന്റെ പ്രതികരണം അശ്രദ്ധം. എട്ടാം മിനിറ്റില് കസിയസിന്റെ പിഴവ് റയലിനെ ശരിക്കു ശിക്ഷിച്ചുകളഞ്ഞു. ടെവസിന്റെ നിലംപറ്റിയുള്ള ക്രോസ് തട്ടിയകറ്റാനെ കസിയസിനു സാധിച്ചുള്ളു. റീബൗണ്ട് പിടിച്ച മൊറാട്ട ലക്ഷ്യംകണ്ടു (1-0).
ഗോള് വീണതോടെ റയല് ഉണര്ന്നു. ടോണി ക്രൂസിന്റെ നല്ലൊരു ഡ്രൈവ് തടുക്കാന് ബഫണിന് അല്പ്പം ആയാസപ്പേടേണ്ടിവന്നു. ക്രിസ്റ്റ്യാനോയുടെ ഇടംകാലന് ഷോട്ടും പുറത്തേക്കുപോയി. ഒടുവില് റയലിന്റെ സമ്മര്ദ്ദത്തിന് ഫലം ലഭിച്ചു. 27-ാം മിനിറ്റില് ജെയിംസ് റോഡ്രിഗസിന്റെ ക്രോസ് സിആര്7 ക്ലോസ്റേഞ്ച് ഹെഡ്ഡറിലൂടെ വലയിലാക്കി (1-1).
ഒന്നാം പകുതി അന്ത്യത്തോടടുക്കവെ ലീഡ് ഉയര്ത്താന് റയലിന് അവസരം കിട്ടിയതാണ്. എന്നാല് ഇസ്കോയുടെ ക്രോസില് റോഡ്രിഗസിന്റെ ഹെഡ്ഡറിന് ക്രോസ് ബാര് വിഘാതം സൃഷ്ടിച്ചു. ആ സമയം ബഫണ് സ്ഥാനംതെറ്റി നില്ക്കുകയായിരുന്നു.
രണ്ടാം പകുതി അലസവും അലക്ഷ്യവുമായ നീക്കങ്ങളോടെ തുടങ്ങി. 57-ാം മിനിറ്റില് തിരക്കഥയില് ചെറിയൊരു മാറ്റം. സ്വന്തം പകുതിയില് നിന്ന് പന്തുമായി കുതിച്ച യുവന്റസ് സ്ട്രൈക്കര് കാര്ലോസ് ടെവസിനെ തടയാന് ഡാനി കര്വാജല് പരുക്കന് അടവു പുറത്തെടുത്തു. റഫറി പെനാല്റ്റി സ്പോട്ടിലേക്ക് തുറിച്ചുനോക്കി. കിക്കെടുത്ത ടെവസ് നിഷ്പ്രയാസം കസിയസിനെ കീഴടക്കി (2-1).
പിന്നെ സമനിലയ്ക്കായി റയല് കിണഞ്ഞു ശ്രമിച്ചെങ്കിലും ഫലമുണ്ടായില്ല. ഇടതു പാര്ശ്വത്തില് നിന്ന് റോഡ്രിഗസ് നല്കിയ ക്രോസിന് പൂര്ണതയേകാന് ക്രിസ്റ്റിയാനോയ്ക്ക് കഴിഞ്ഞില്ല. യുവന്റസിന്റെ ഫെര്ണാണ്ടോ ലോറന്റെയുടെ ഹെഡ്ഡര് കസിയസ് കൈയിലൊതുക്കുമ്പോള് ഫൈനല് വിസില്.
പ്രതികരിക്കാൻ ഇവിടെ എഴുതുക: