ശബരിമല സന്നിധാനത്തിലെ ദേവസ്വം ബോര്ഡ് കൗണ്ടറുകളില് നിന്ന് സ്വാമി ഭക്തര്ക്ക് ലഭിക്കുന്നതാണ് അയ്യപ്പചക്രം. ഇത് പൂജിക്കുന്നത് ഐശ്വര്യപ്രദായകമാണെന്ന് നിരവധി അനുഭവസ്ഥര് സാക്ഷ്യപ്പെടുത്തുന്നു. വളരെ കൃത്യതയോടെയാണ് അയ്യപ്പചക്രത്തിലെ യന്ത്രങ്ങള്. കമ്പ്യൂട്ടറില് വരച്ചെടുത്ത വൃത്തങ്ങള്ക്കും കോണുകള്ക്കും വളരെയേറെ കൃത്യതയുണ്ട്. എല്ലാ മന്ത്രങ്ങളും വ്യക്തതയോടെ വായിച്ചെടുക്കാം. ഗുണമേന്മയുള്ള ചെമ്പുതകിടില് നിര്മിച്ച് വെള്ളിപൂശിയാണ് അയ്യപ്പചക്രം തയ്യാറാക്കിയിട്ടുള്ളത്.
അയ്യപ്പസ്വാമിയുടെ വര്ണചിത്രവും ദേവസ്വം ബോര്ഡിന്റെ ലോഗോയും അച്ചടിച്ച ആകര്ഷകമായ പായ്ക്കറ്റിലാണ് അയ്യപ്പചക്രം ലഭിക്കുന്നത്. അയ്യപ്പ ചക്രത്തിന്റെ പ്രത്യേകതകള് കവറിന് പുറത്ത് ആറുഭാഷകളില് രേഖപ്പെടുത്തിയിട്ടുണ്ട്.
ദേവസ്വം കൗണ്ടറുകളില്നിന്ന് വാങ്ങുന്ന ചിത്രം പ്രത്യേകം രസീത് വാങ്ങിയാല് ക്ഷേത്രത്തില് നിന്നുതന്നെ പൂജിച്ചു ലഭിക്കും. ഭക്തന്മാരുടെ ഗൃഹത്തിലും തൊഴില് സ്ഥാപനങ്ങളിലും വാഹനങ്ങളിലും ശ്രീധര്മശാസ്താവിന്റെ ചൈതന്യം ആവാഹിച്ച അയ്യപ്പചക്രം വച്ച് പൂജിച്ചാല് ഭഗവത് സാന്നിധ്യം ഉണ്ടാകുമെന്ന് ഭക്തന്മാര് വിശ്വസിക്കുന്നു. ചക്രം ഒന്നിന് 120 രൂപാ വിലയ്ക്കാണ് ദേവസ്വം ബോര്ഡ് വിറ്റുവരുന്നത്.
തമിഴ്നാട്, ആന്ധ്രാപ്രദേശ്, കര്ണാടക എന്നിവിടങ്ങളിലെ ഭക്തന്മാരാണ് അയ്യപ്പചക്രങ്ങള് വാങ്ങാന് കൂടുതല് താല്പ്പര്യം കാണിക്കാറുള്ളത്. എന്നാല് മലയാളികളും ഇപ്പോള് ധാരാളമായി ചക്രങ്ങള് വാങ്ങുന്നുണ്ട്.
മാന്ത്രിക ഏലസ്സുകളും ധനവര്ധന യന്ത്രങ്ങളുടെയും പേരില് വന് പരസ്യങ്ങള് നല്കി ചിലര് തട്ടിപ്പു നടത്തുമ്പോഴാണ് ശബരിമലയില് ദേവസ്വം ബോര്ഡ് കൃത്യതയോടുകൂടിയ അയ്യപ്പചക്രങ്ങള് വളരെ കുറഞ്ഞ വിലയ്ക്ക് വിറ്റുവരുന്നത്.
പ്രതികരിക്കാൻ ഇവിടെ എഴുതുക: