ചെറുപുഴ: നിര്ധനരോഗികള്ക്ക് ചികിത്സാ സഹായം സ്വരൂപിക്കാന് ചെറുപുഴ–പയ്യന്നൂര് റൂട്ടിലോടുന്ന അതുല് മോട്ടോര്സ് ബസ് കാരുണ്യഹസ്തം എന്നപേരില് ഫണ്ട് ശേഖരണയാത്ര നടത്തി. കാക്കയംചാല് ജേസീസിന്റെ ആഭിമുഖ്യത്തിലാണ് ഫണ്ട് ശേഖരണയാത്ര. ഇന്നലെ രാവിലെമുതല് പുളിങ്ങോത്തുനിന്ന് പയ്യന്നൂരിലേക്ക് ഒരുദിവസം നടത്തുന്ന 3 സര്വീസിനിടെ ടിക്കറ്റിന് പകരം സ്വീകരിക്കുന്ന തുകയാണ് ചികിത്സാസഹായഫണ്ടിലെത്തിയത്. ചെറുപുഴ പഞ്ചായത്ത് പ്രസിഡന്റ് ജമീല കോളയത്ത് യാത്ര ഫ്ളാഗ്ഓഫ് ചെയ്തു.
ചെറുപുഴ പഞ്ചായത്തില് കര്ണാടക വനാതിര്ത്തിയോട് ചേര്ന്ന കോഴിച്ചാലിലെ രണ്ട് ബൂത്തുകളില് കൂടുതല് സേനയെ വിന്യസിക്കും
ചെറുപുഴ: ചെറുപുഴ പഞ്ചായത്തില് കര്ണാടക വനാതിര്ത്തിയോട് ചേര്ന്ന കോഴിച്ചാലിലെ രണ്ട് ബൂത്തുകളില് കൂടുതല് സേനയെ വിന്യസിക്കും. മാവോയിസ്റ്റ് ഭീഷണിയുടെ പശ്ചാത്തലത്തിലാണിത്. മാവോയിസ്റ്റ് സാന്നിധ്യം സ്ഥിരീകരിച്ച കര്ണാടക വനാതിര്ത്തിയിലെ മങ്കുണ്ടി എസ്റ്റേറ്റിനോട് ചേര്ന്നുകിടക്കുന്ന കാനംവയല്, രാജഗിരി പ്രദേശങ്ങളിലെ വോട്ടര്മാരുള്പ്പെടുന്നതാണ് ഈ ബൂത്തുകള്. നിലവില് മാവോയിസ്റ്റ് സാന്നിധ്യമില്ലെങ്കിലും ഈ മേഖലയില് കര്ണാടക വനം വകുപ്പും പൊലീസും കനത്ത ജാഗ്രതയിലാണ്.
2013 ഫെബ്രുവരിയിലാണ് കര്ണാടക വനമേഖലയില് മാവോയിസ്റ്റ് നേതാവ് രൂപേഷ് ഉള്പ്പെട്ട സംഘമെത്തിയത്. തെരഞ്ഞെടുപ്പ് അട്ടിമറിക്കുന്നത് ലക്ഷ്യമിട്ട് മാവോയിസ്റ്റുകള് എത്താനുള്ള സാധ്യത മുന്നിര്ത്തിയാണ് കേരള പൊലീസ് ഇവിടെ കൂടുതല് സേനയെ വിന്യസിക്കുന്നത്. പൊലീസ് പട്രോളിങ്ങും ശക്തമാക്കിയിട്ടുണ്ട്.
കര്ണാടക വനംവകുപ്പിന്റെ കീഴിലെ മുണ്ടറോട്ട് റേഞ്ചിലുള്പ്പെട്ട ആറാട്ട് കടവ് ചെക്ക്പോസ്റ്റില് ഒരുകമ്പനി അര്ധസൈനിക വിഭാഗം സേവനമനുഷ്ടിക്കുന്നുണ്ട്. തെരഞ്ഞെടുപ്പിന് മുന്നോടിയായി പെരിങ്ങോം പൊലീസ് സ്റ്റേഷന് പരിധിയില് കഴിഞ്ഞ ദിവസം കേന്ദ്രസേന റൂട്ടു മാര്ച്ച് നടത്തിയിരുന്നു. ഇന്ന് ചെറുപുഴ പൊലീസ് സ്റ്റേഷന് പരിധിയില് കേന്ദ്രസേന റൂട്ടു മാര്ച്ച് നടത്തും .ഇന്ഡോ ടിബറ്റന് ബോര്ഡര് പൊലീസിന്റെ ഒരു കമ്പനി സേനയെയാണ് ഇവിടെ വിന്യസിച്ചത് .
പ്രതികരിക്കാൻ ഇവിടെ എഴുതുക: