ഗുവാഹത്തി: ആസാമിൽ കോൺഗ്രസിനെ തൂത്തെറിഞ്ഞ ബിജെപി കൂടുതൽ വടക്കു കിഴക്കൻ സംസ്ഥാനങ്ങളിൽ ആധിപത്യം ഉറപ്പിക്കാൻ ലക്ഷ്യമിടുന്നു. ഏഴ് സഹോദരിമാർ എന്നറിയപ്പെടുന്ന വടക്കു കിഴക്കൻ സംസ്ഥാനങ്ങളിൽ അവശേഷിക്കുന്ന മറ്റ് ആറ് സംസ്ഥാനങ്ങളിലേക്ക് പാർട്ടിയെ ബലപ്പെടുത്താനുള്ള ശ്രമത്തിലാണെന്ന് പ്രധാന മന്ത്രി നരേന്ദ്ര മോദി. കഴിഞ്ഞ ദിവസം ആസാം മുഖ്യമന്ത്രി സോനോവാളിന്റെ സത്യപ്രതിജ്ഞ ചടങ്ങിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.
കോൺഗ്രസ് അധികാരത്തിലിരിക്കുന്ന മണിപ്പൂർ, മേഘാലയ തുടങ്ങിയ സംസ്ഥാനങ്ങളിൽ ഉടൻ തന്നെ പാർട്ടിക്ക് ശക്തി കേന്ദ്രമായി മാറാൻ സാധിക്കുമെന്ന് അദ്ദേഹം പറഞ്ഞു. ആസാമിൽ ബിജെപി അധികാരത്തിൽ വന്നത് ജനങ്ങളുടെ പൂർണ്ണ പിന്തുണയുള്ളതു കൊണ്ടാണ്,പുതിയ സർക്കാർ ജനങ്ങളുടെ വിശ്വാസത്തെ പൂർണ്ണമായും ഉൾക്കൊള്ളുകയും അതിനനുസരിച്ച് പ്രവർത്തിക്കുമെന്നാണ് താൻ കരുതുന്നത്. ഇനി നല്ല നാളുകളാണ് സംസ്ഥാനത്ത് വരാനിരിക്കുന്നതെന്നും അദ്ദേഹം പറഞ്ഞു.
വടക്കു കിഴക്കൻ രാജ്യങ്ങളെ വെല്ലുന്ന തരത്തിൽ ആസാമിന് സാമ്പത്തിക പുരോഗതി കൈവരാനാകും, കേന്ദ്ര സർക്കാർ എല്ലാ അവസരങ്ങളിലും ആസാം ജനതയ്ക്ക് പിന്തുണ നൽകുമെന്നും മോദി പറഞ്ഞു. കൂടാതെ സോനോവാളിന് എല്ലാ വിധ ആശംസകളും അദ്ദേഹം നേർന്നു.
പ്രതികരിക്കാൻ ഇവിടെ എഴുതുക: