കൊട്ടാരക്കര: കൊല്ലം റൂറല് പോലീസ് ജില്ലയില് ഡയല് 100 സംവിധാനം നിലവില് വന്നു.
കൊല്ലം റൂറല് പോലീസ് ജില്ലയില് ഡയല് 100 സംവിധാനത്തിന്റെയും വിപുലീകരിച്ച കണ്ട്രോള് റൂമിന്റേയും ഉദ്ഘാടനം റൂറല് ജില്ലാപോലീസ് മേധാവി അജിതാ ബീഗം നിര്വഹിച്ചു.
നിലവില് പൊതുജനങ്ങളുടെ പരാതി ഡയല് 100 സംവിധാനം വഴി അറിയിക്കുമ്പോള് കൊല്ലം സിറ്റി കമ്മീഷണറുടെ ഓഫീസ് കണ്ട്രോള് റൂം വഴിയായിരുന്നു ജില്ലയിലെ വിവിധ സ്റ്റേഷനുകളില് പരിഹാരം കണ്ടിരുന്നത്.
കൊല്ലം റൂറല് പോലീസില് ഡയല് 100 സംവിധാനം നിലവില് വന്നതോടെ 24 മണിക്കൂറും പോലീസിന്റെ സേവനം പൊതുജനങ്ങള്ക്ക് ലഭിക്കുമെന്ന് റൂറല് എസ്പി പറഞ്ഞു. പൊതുജനങ്ങളുടെ പരാതി സ്വീകരിച്ച് കണ്ട്രോള് റൂം യൂണിറ്റ് വയര്ലന്സ് സംവിധാനം വഴി അതാതു പോലീസ് സ്റ്റേഷനുകളില് പരാതികള് പരിഹരിക്കുവാനുള്ള നടപടികള് സ്വീകരിക്കും.
റൂറല് പോലീസ് ആസ്ഥാനത്തിന് സമീപമുള്ള കെട്ടിടത്തിലാണ് പുതിയതായി ആരംഭിച്ച ഡയല് 100 സംവിധാനവും വിപുലീകരിച്ച് കണ്ട്രോള്റൂം യൂണിറ്റും പ്രവര്ത്തനം ആരംഭിച്ചത്. പൊതുജനങ്ങള്ക്ക് 100 എന്ന നമ്പരില് വിളിച്ച് ഏത് വിവരവും പോലീസ് കണ്ട്രോള് റൂമിനെ അറിയിക്കാനാകും.
പൊതുജനങ്ങളുടെ പരാതികളും സ്വീകരിക്കും. കൃത്യസമയത്ത് അതിന്റെ നടപടിക്രമങ്ങള് പരാതിക്കാരെ അറിയിക്കാനുള്ള സംവിധാനവും ഇവിടെ ഒരുക്കിയിട്ടുണ്ട്. ഡിവൈഎസ്പിമാരായ എ.അശോകന്, എസ്.മധുസൂദനന്, അഡ്മിനിസ്ട്രേറ്റീവ് ഡിവൈഎസ്പി, കെ.എല്.ജോണ്കുട്ടി, സ്പെഷ്യല് ബ്രാഞ്ച് ഡിവൈഎസ്പി, എസ്.അനില്ദാസ്, ഡിസിആര്ബി വിജയകുമാരന് നായര്, വനിതാസെല് സിഐ അനിതകുമാരി, റൂറല് പോലീസ് ജില്ലയിലെ പോലീസ് ഉദ്യോഗസ്ഥര് തുടങ്ങിയവര് പങ്കെടുത്തു.
പ്രതികരിക്കാൻ ഇവിടെ എഴുതുക: