കുട്ടനാട്: രണ്ടാംകൃഷി ഇറക്കിയ നെടുമുടി, ചമ്പക്കുളം, എടത്വ എന്നീ കൃഷിഭവന്റെ പരിധികളില് വരുന്ന പാടശേഖരങ്ങളില് ബ്ലാസ്റ്റ് രോഗത്തിന്റെ പ്രാരംഭ ലക്ഷണങ്ങള് കാണുന്നതായി മങ്കൊമ്പ് കീടനിരീക്ഷണകേന്ദ്രം അധികൃതര് അറിയിച്ചു.
പുത്തന്കരി, പുളിക്കകാവ്, മണത്രാക്കല് ഗണപതി, മുൂറ്റും പാടം, ഉന്തം വേലി, ദേവളസ്വം വരമ്പിനകം എന്നീ പാടശേഖരങ്ങളിലാണ് രോഗം കാണപ്പെടുന്നത്. കണ്ണിന്റെ ആകൃതിയിലുള്ളതും നടുഭാഗത്ത് ചാരനിറമുള്ളതുമായ പുള്ളിക്കുത്തുകള് ഓലകളില് പ്രത്യക്ഷപ്പെടുതാണ് ആദ്യ രോഗലക്ഷണം. ചില പാടങ്ങളില് വരിനെല്ലിലാണ് രോഗലക്ഷണം കണ്ടു തുടങ്ങിയിട്ടുള്ളത്. അനുകൂല കാലാവസ്ഥ തുടരുന്ന പക്ഷം, നെല്ലിലേക്കും രോഗം വ്യാപിക്കാന് സാധ്യതയുണ്ട്. ആകയാല് മുകളില് കൊടുത്തിരിക്കുന്ന പാടശേഖരങ്ങളിലെ കര്ഷകര്, രോഗലക്ഷണമോ രോഗവ്യാപന ലക്ഷണമോ കാണുകയാണെങ്കില്, സാങ്കേതിക ഉപദേശം തേടേണ്ടതാണന്നും അധികൃതര് മുന്നറിയിപ്പു നല്കുന്നു.
സാങ്കേതിക ഉപദേശത്തിന്റെ അടിസ്ഥാനത്തില് മാത്രം പ്രതിരോധമാര്ഗങ്ങള് സ്വീകരിച്ചാല് മതിയാകുമെന്നാണ് വിദഗ്ദരുടെ അഭിപ്രായം. മങ്കൊമ്പ് കീടനിരീക്ഷണകേന്ദ്രത്തിലെ ഫീല്ഡ് ഉദ്യോഗസ്ഥര്, കൃഷിയിടങ്ങള് സന്ദര്ശിച്ച് കര്ഷകര്ക്ക് ആവശ്യമായ സാങ്കേതിക നിര്ദ്ദേശങ്ങള് നല്കുന്നതായിരിക്കും. കൂടുതല് വിവരങ്ങള്ക്കായി നെടുമുടി 9400142409, ചമ്പക്കുളം 703434215, എടത്വ 9061001758 എന്നീ നമ്പരുകളില് ബന്ധപ്പെടണമെന്ന് അധികൃതര് അറിയിച്ചു.
പ്രതികരിക്കാൻ ഇവിടെ എഴുതുക: