നിങ്ങളുടെ ഇളം തോളുകള് വിലയുറ്റ രണ്ടു പൈതൃകം പേറുന്നു- ആരാധ്യ, മുതുമുത്തച്ഛന്മാര് ഡോ. ഹരിവംശ് റായ് ബച്ചന്റേതും നവ്യ, എച്ച്. പി. നന്ദയുടെയും. അവര് രണ്ടും സമ്മാനിച്ചത് പ്രശസ്തിയും മാന്യതയും അംഗീകാരവും നിറഞ്ഞ കുടുംബപ്പേരാണ്.
നന്ദയോ ബച്ചനോ ആണെങ്കിലും നിങ്ങള് പെണ്കുട്ടികളാണ്, സ്ത്രീകള്!
ജനം അവരുടെ ചിന്തയും നിയന്ത്രണങ്ങളും നിങ്ങള്ക്കുമേല് അടിച്ചേല്പ്പിച്ചേക്കാം. നിങ്ങളെങ്ങനെ വസ്ത്രം ധരിക്കണം, എങ്ങനെ പെരുമാറണം, ആരെ കാണാം, എവിടെ പോകാം എന്നെല്ലാം അവര് പറഞ്ഞേക്കാം. മറ്റുള്ളവരുടെ തീരുമാനങ്ങളുടെ നിഴലില് കഴിയരുത്. സ്വന്തം ചിന്തയുടെ വെളിച്ചത്തില് സ്വയം തീരുമാനിക്കുക. ഉടുപ്പിന്റെ ഇറക്കത്തിലല്ല നിങ്ങളുടെ വ്യക്തിത്വമെന്ന് മനസിലാക്കിക്കൊടുക്കുക. നിങ്ങളുടെ ചങ്ങാതിമാര് ആരാകണമെന്ന് അന്യര് നിശ്ചയിക്കാനിടവരുത്താതിരിക്കുക. വേണമെന്നു നിങ്ങള്ക്കു തോന്നുമ്പോഴല്ലാതെ മറ്റു കാരണങ്ങളാല് വിവാഹത്തിനൊരുങ്ങാതിരക്കുക.
ആകര്ഷകമായ പലതും പലരും പറയും. എല്ലാം ശ്രദ്ധിക്കണമെന്നില്ല, നാട്ടുകാരെന്തുപറയുന്നുവെന്ന് വ്യസനിക്കേണ്ട. ഒടുവില്, നിങ്ങളുടെ പ്രവൃത്തിയുടെ ഫലം നിങ്ങള്തന്നെയാണ് അനുഭവിക്കേണ്ടത്. അതിനാല്, തീരുമാനം മറ്റുള്ളവരുടേതാകരുത്.
നവ്യ – നിന്റെ കുടുംബപ്പേര്, വിഷമഘട്ടങ്ങളില് തുണയ്ക്കണമെന്നില്ല, കാരണം നീ പെണ്ണാണ്. ആരാധ്യ – ഈ പറയുന്നത് നിനക്കു മനസ്സിലാകുമ്പോള് ഞാന് ഒപ്പമുണ്ടാവണമെന്നില്ല. എങ്കിലും, എന്നും പ്രസക്തമാണെന്ന് കരുതുന്നു.
ഈ ലോകം ഒരു പെണ്ണിന് ഏറെ വിഷമം പിടിച്ചതാവാം. നിങ്ങളെപ്പോലുള്ളവര്ക്ക് അതു മാറ്റാം. സ്വയം നിയന്ത്രണങ്ങള്, സ്വന്തം നിശ്ചയങ്ങള്, അന്യരുടെ വിധിക്കുപരിയായ വളര്ച്ച, ഇതൊന്നും എളുപ്പമല്ല. പക്ഷേ, നിങ്ങള്ക്കാകും! എല്ലാ സ്ത്രീകള്ക്കും മാതൃകയാകാന് കഴിയും. ഞാന് ചെയ്തതിലേറെ നിങ്ങള്ക്കു ചെയ്യാനുണ്ട്, അമിതാഭ് ബച്ചനെന്നതിനേക്കാള്, നിങ്ങളുടെ മുത്തച്ഛനെന്നറിയപ്പെടുന്നതാണ് എനിക്കേറെ സമ്മാന്യത!!
ഏറെ പ്രിയത്തോടെ മുത്തച്ഛന്, നാനാ
പ്രതികരിക്കാൻ ഇവിടെ എഴുതുക: