മറയൂര്: സ്വകാര്യ വ്യക്തിയുടെ കൃഷിയിടത്തില് നട്ടുവളര്ത്തിയ കഞ്ചാവുചെടികള് പോലീസ് കണ്ടെത്തി. മറയൂര് കീഴാന്തല്ലൂര് പെരടിപള്ളം മാരിമുത്തുവിന്റെ കൃഷിയിടത്തില് നിന്നുമാണ് മൂന്നരമാസം പ്രായമായ മൂന്ന് കഞ്ചാവ് ചെടികള് കണ്ടെത്തിയത്. മറയൂര് കീഴാന്തല്ലൂര് ഭാഗത്ത് സ്വകാര്യ വ്യക്തി സ്വന്തം കൃഷിയിടത്തില് കഞ്ചാവ് ചെടികള് നട്ടുവളര്ത്തുന്നതായി മറയൂര് എസ്ഐ കെ എ ഷാജിക്ക് ലഭിച്ച രഹസ്യവിവരത്തിന്റെ അടിസ്ഥാനത്തില് നടത്തിയ പരിശോധനയിലാണ് കഞ്ചാവ് ചെടി കണ്ടെത്തിയത്.
വീട്ടില് നിന്നും പ്രതിയെ പിടികൂടുകയും ചെയ്തു. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു. എസ്ഐക്കൊപ്പം എഎസ്ഐ സണ്ണി, സീനിയര് സിവില് പോലീസ് ഓഫീസര്മാരായ ജോബി, അനീഷ്, മനോജ്, അരുണ്, ഷിഹാസ് എന്നിവരും റെയ്ഡില് പങ്കെടുത്തു.
ഹൈറേഞ്ച് മേഖലയില് ചെറുതും വലുതുമായ രീതിയില് കഞ്ചാവ് കൃഷി ചെയ്യുന്നുണ്ടെന്ന് സ്പെഷ്യല് ബ്രാഞ്ച് കണ്ടെത്തിയിരുന്നു. ഇതിന്റെ അടിസ്ഥാനത്തില് എക്സൈസും പോലീസും പരിശോധനകള് ശക്തമാക്കിയിരിക്കുകയാണ്.
മൂന്നാഴ്ച മുന്പ് തമിഴ്നാട് അതിര്ത്തിയില് നിന്നും നടാനായി പാകിയ നൂറുകണക്കിന് കഞ്ചാവ് ചെടികള് കണ്ടെത്തിയിരുന്നു.
പ്രതികരിക്കാൻ ഇവിടെ എഴുതുക: