മുംബൈ: നിരോധിത പ്രദേശത്ത് ഡ്രോൺ പറപ്പിച്ച സംഭവവുമായി ബന്ധപ്പെട്ട് മുന്ന് പേരെ പോലീസ് അറസ്റ്റ് ചെയ്തു. ഛത്രപതി ശിവജി അന്താരാഷ്ട്ര വിമാനത്താവളത്തില് റണ്വേയ്ക്കു സമീപം ഡ്രോൺ പറത്തിയ രാഹുല് രാജ്കുമാര് ജെയ്സ്വാള് (24), റാണ സുബാഷ് സിംഗ് (25), വിദിചന്ദ് ജെയ്സ്വാള് (45) എന്നിവരാണ് ക്രൈംബ്രാഞ്ച് സംഘത്തിന്റെ പിടിയിലായത്.
കഴിഞ്ഞ ദിവസം വിമാനത്താവളത്തില് ലാന്ഡിംഗിനിടെ ഡ്രോണ് ശ്രദ്ധയില്പ്പെട്ടതായി ഇന്ഡിഗോ എയര്ലൈന്സിന്റെ പൈലറ്റ് റിപ്പോര്ട്ട് ചെയ്തിരുന്നു. തുടർന്ന് പോലീസ് നടത്തിയ അന്വേഷണത്തിൽ ചാർകോപ് പ്രദേശത്ത് സിനിമാ ഷൂട്ടിങിന്റെ ചിത്രീകരണത്തിനിടെയാണ് ഇവർ ഡ്രോൺ പറത്തിയതെന്ന് തെളിഞ്ഞു. രാഹുലും റാണയുമാണ് ഡ്രോണ് കാമറ പറത്തിയതെന്നും വിദിചന്ദ് ഡ്രോണ് കാമറ വാടകക്ക് നല്കുന്നയാളാണെന്നും പോലീസ് പറഞ്ഞു.
ഇവരെ കൂടുതൽ അന്വേഷണങ്ങൾക്ക് വിധേയരാക്കുമെന്ന് പോലീസ് അറിയിച്ചു. ഡ്രോണ്, റിമോട്ട് ഉപയോഗിച്ചു പറപ്പിക്കുന്ന ചെറു വിമാനങ്ങള്, പാരാ ഗ്ലൈഡേഴ്സ്, ബലൂണ് എന്നിവ ആകാശത്ത് പറപ്പിക്കുന്നത് മുംബൈ നഗരത്തില് നിരോധിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: