കോട്ടയം: കോട്ടയം സോഷ്യല്സര്വ്വീസ് സൊസൈറ്റി സംഘടിപ്പിക്കുന്ന 19-ാമത് ചൈതന്യ കാര്ഷികമേളയ്ക്കും സ്വാശ്രയ സംഘമഹോത്സവത്തിനും മുന്നൊരുക്കമായുള്ള ഭക്ഷ്യസുരക്ഷ വിളംബര സന്ദേശയാത്രയ്ക്ക് ഇന്ന് തുടക്കം. ഉച്ചകഴിഞ്ഞ് 2.45ന് കോട്ടയം തിരുനക്കര ബസ്സ്റ്റാന്റില് സംഘടിപ്പിക്കുന്ന ചടങ്ങില് തിരുവഞ്ചൂര് രാധാകൃഷ്ണന് എംഎല്എ യാത്രയുടെ ഫ്ളാഗ് ഓഫ് നിര്വ്വഹിക്കും. അഡ്വ. മോന്സ് ജോസഫ് എഎല്എ, കെഎസ്എസ്എസ് പ്രസിഡന്റുമായ ഫാ. മൈക്കിള് വെട്ടിക്കാട്ട്, കോട്ടയം ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ്, മുനിസിപ്പല് ചെയര്പേഴ്സണ് ഡോ. സോന പി.ആര്, സൊസൈറ്റി സെക്രട്ടറി ഫാ. ബിന്സ് ചേത്തലില്, അസ്സി. സെക്രട്ടറി ഫാ. ബിബിന് കണ്ടോത്ത് എന്നിവര് പങ്കെടുക്കും. വിളംബര സന്ദേശയാത്ര കോട്ടയം, ഇടുക്കി, ആലപ്പുഴ, എറണാകുളം, പത്തനംതിട്ട ജില്ലകളിലെ വിവിധ പ്രദേശങ്ങളിലൂടെ സഞ്ചരിക്കും. സന്ദേശയാത്രയോടനുബന്ധിച്ച് വിവിധ കേന്ദ്രങ്ങളില് സ്വീകരണവും ആകര്ഷകങ്ങളായ മത്സരങ്ങളും സംഘടിപ്പിക്കും. സംസ്ഥാന സര്ക്കാരിന്റെയും കൃഷിവകുപ്പിന്റെയും ആകാശവാണിയുടേയും പങ്കാളിത്തത്തോടെ നവംബര് 23മുതല് 27വരെ തീയതികളില് കോട്ടയം തെള്ളകം ചൈതന്യ പാസ്റ്ററല് സെന്ററിലാണ് ചൈതന്യ കാര്ഷികമേള നടത്തപ്പെടുന്നത്.
പ്രതികരിക്കാൻ ഇവിടെ എഴുതുക: