പത്തനംതിട്ട: ശബരിമല ശ്രീ ധര്മ്മശാസ്താ ക്ഷേത്രം ചിത്തിര ആട്ടവിശേഷ പൂജകള്ക്കായി 28ന് വൈകിട്ട് 5ന് തുറക്കും. തിരുവിതാംകൂറിലെ അവസാന നാടുവാഴിയായിരുന്ന ശ്രീ ചിത്തിര തിരുനാള് മഹാരാജാവിന്റെ പിറന്നാള് ആഘോഷമായ ചിത്തിര വിശേഷപൂജകള് 29ന് അടയ്ക്കും.
വിശേഷാല് പൂജകളായ പടിപൂജയും ഉദയാസ്തമനപൂജയും ഉണ്ടായിരിക്കുമെങ്കിലും അഷ്ടബന്ധകലശം നടന്നതിനാല് നെയ്യഭിഷേകം ഇല്ല. 29 ന് രാത്രി നട അടച്ച് മണ്ഡല മകരവിളക്ക് ഉത്സവത്തിനായി നവംബര് 15ന് വൈകിട്ട് 5ന് വീണ്ടും തുറക്കും.
ഗുരുസ്വാമിമാരെ ആദരിക്കുന്നതിന്റെ ഭാഗമായി ശബരിമല ക്ഷേത്രത്തില് ദര്ശനം നടത്തുന്ന ഗുരുസ്വാമിമാരുടെ പട്ടിക ദേവസ്വം ബോര്ഡ് തയ്യാറാക്കും. ഇതില് ഗുരുസ്വാമിമാര് ദര്ശനം ആരംഭിച്ച കാലംമുതലുള്ള വിവരങ്ങള് ഉള്പ്പെടുത്തും. ശബരിമലയുടെ വിശുദ്ധി സംരക്ഷിക്കുന്ന പ്രവര്ത്തനങ്ങളുടെ ഭാഗമായാണ് ഗുരുസ്വാമിമാരെ ആദരിക്കുന്നത്.
കൂടുതല് വിവരങ്ങള് ഡയറക്ടര്, സാംസ്കാരിക-പുരാവസ്തുവിഭാഗം, തിരുവിതാംകൂര് ദേവസ്വംബോര്ഡ്,നന്ദന്കോട് , തിരുവനന്തപുരം (ഫോണ് 04712319845, 9847050087) എന്ന വിലാസത്തില് ലഭിക്കും.
പ്രതികരിക്കാൻ ഇവിടെ എഴുതുക: