ഇളങ്ങുളം: പിപി റോഡില് ഇളങ്ങുളം പള്ളി ജംങ്ഷനില് കാറുകള് കൂട്ടിയിച്ചു നാലു പേര്ക്കു പരിക്ക്. ബുധനാഴ്ച ഉച്ചകഴിഞ്ഞ് രണ്ടു മണിയോടെയായിരുന്നു അപകടം.
ഒരേ ദിശയില് പോവുകയായിരുന്നു കാറുകള് മുമ്പില് പോയ കാര് പെട്ടെന്ന് വലതുദിശയിലേക്കു തിരിക്കുന്നതിനിടെ പിന്നാലെയെത്തിയ കാര് ഇടിച്ചാണ് അപകടമുണ്ടായത്.
കാറോടിച്ചിരുന്ന ഇളങ്ങുളം ചീരാംകുഴിയില് കുര്യാച്ചന്റെ ഭാര്യ ലൈസമ്മ (62), പിന്നാലെ വന്ന കാറിലുണ്ടായിരുന്ന പെരുമ്പാവൂര് ചെമ്പകശേരില് പൊയ്ക്കാട്ടില് രാഖിബോസ് (36), സി.എം. ബോസ് (40), മേരി മത്തായി (67) എന്നിവര്ക്കാണ് പരിക്കേറ്റത്. തലയ്ക്കു പരിക്കേറ്റ ലൈസമ്മയെ തെള്ളകത്തെ മാതാ ആശുപത്രിയിലും മറ്റുള്ളവരെ പൊന്കുന്നം പിഎന്പി മെമ്മോറിയല് ഹിന്ദു മെഡിക്കല് മിഷന് ആശുപത്രിയിലും പ്രവേശിപ്പിച്ചു.
അപകടത്തെത്തുടര്ന്ന് ഇരുകാറുകളും ഭാഗീകമായി തകര്ന്നു. റോഡില് കാറുകളിലെ ഓയിലും ഇന്ധനവും വീണതിനെത്തുടര്ന്ന് കാഞ്ഞിരപ്പള്ളിയില് നിന്നെത്തിയ അഗ്നിശമനസേന ഈ ഭാഗങ്ങളില് അറക്കപ്പൊടി വിതറി ഗതാഗതം സുഗമമാക്കി. പൊന്കുന്നം പോലീസ് സ്ഥലത്തെത്തി മേല്നടപടികള് സ്വീകരിച്ചു. സംസ്ഥാനപാതാ നവീകരണത്തിനു ശേഷം പിപി റോഡിന്റെ വിവിധ ഭാഗങ്ങളില് അപകടം നിത്യസംഭവമാണ്.
പ്രതികരിക്കാൻ ഇവിടെ എഴുതുക: