ഭഗവാന്റെ ബാഹ്യശക്തിയായ മായയാല് ബദ്ധരായി, ബോധം നശിച്ച ജീവാത്മാക്കള് ഭൗതിക പ്രപഞ്ചത്തില് ശാന്തിയുടെയും സുഖത്തിന്റെയും പൊരുളറിയാതെ ഓടിക്കൊണ്ടിരിക്കുകയാണ്. ശ്രീകൃഷ്ണഭഗവാന് ഗീതയിലൂടെ അവരോട് (അതായത് നമ്മളോട്) വിളിച്ചുപറയുന്നത് ശ്രദ്ധിച്ചുകേള്ക്കാം.
മാം ജ്ഞാത്വാ- ആദ്യം എന്നെ മനസ്സിലാക്കൂ! എന്റെ വാക്കുകള് ശ്രദ്ധിച്ച്, വിശ്വസിച്ച് ഉള്ക്കൊള്ളുവിന്!
സര്വ്വഭൂതാനാം സുഹൃദം- ഞാന് നിങ്ങളുടെയെല്ലാം-മനുഷ്യ-ദേവ-മൃഗ-പക്ഷി, കീടരൂപങ്ങള് ധരിച്ച് ഓടിനടക്കുന്നു. നിങ്ങളുടെ എല്ലാം സുഹൃത്താണ്. പ്രത്യുപകാരം ആഗ്രഹിക്കാതെ, നിങ്ങളുടെ ഹിതം മാത്രം ചെയ്യാന് വേണ്ടി നടക്കുന്നവനാണ്. ഒരു വ്യക്തിക്ക്, കോടിക്കണക്കിന് ആളുകള്ക്ക് ഹിതം ചെയ്യാന് കഴിയുമോ എന്നല്ലേ നിങ്ങളുടെ സംശയം. ഞാന് നിങ്ങളെപ്പോലെ സാധാരണ മനുഷ്യനല്ല.
ഞാന് കൃഷ്ണനാണ്- നിത്യവും സത്യവും ആനന്ദമയവുമാണ് എന്റെ രൂപം.
”സത്താനന്ദാത്മനാം
കിലാ ഭിലപത്”
മേല്പത്തൂര് ഭട്ടതിരി വിവരിച്ചത് നിങ്ങള് കേട്ടിട്ടില്ലേ?
മാത്രമല്ല ഞാന്- സര്വഭൂത മഹേശ്വരനാണ്. ഇതിന്റെ അര്ത്ഥം ശ്രീശങ്കരാചാര്യര് പറയുന്നത് കേള്ക്കൂ.
”സര്വ്വേഷാം ലോകാനാം മഹാന്തം ഈശ്വരം സര്വ്വഭൂത മഹേശ്വരം?” സ്വര്ഗം മുതല് മേല്പോട്ടു സത്യലോകം വരെയുള്ള ദിവ്യലോകങ്ങളെ ഭരിക്കാനും നിലനിര്ത്താനും ബ്രഹ്മാവ്, ഇന്ദ്രന് തുടങ്ങിയ ഈശ്വരന്മാര് ധാരാളമുണ്ട്. അവര്ക്ക് പ്രവര്ത്തനശക്തി കൊടുക്കുന്നതും, കര്മ്മപദ്ധതി നിര്ദ്ദേശിക്കുന്നതും ഞാനാണ്- ഈ കൃഷ്ണനാണ്. അതുപോലെ, ബ്രഹ്മാവ്, ശിവന് തുടങ്ങി പുഴുക്കള്വരെയുള്ള എല്ലാ ജീവാത്മാക്കളെയും പ്രവര്ത്തിപ്പിക്കുന്നത് ഞാനാണ്; പരമാത്മാവായി നിങ്ങളുടെ ഹൃദയത്തില് നിന്നുകൊണ്ട്. ഞാന് അവിടെ നിന്നില്ലെങ്കില് നിങ്ങള്ക്ക് ഒന്നും ചെയ്യാന് സാധ്യമല്ല. സൂര്യന് ഉദിച്ചില്ലെങ്കില് നിങ്ങള്ക്ക് ഒന്നും ചെയ്യാന് കഴിയില്ലല്ലോ; അതുപോലെ.
യജ്ഞ തപസാം ഭോക്താരം
നിങ്ങള് വേദങ്ങളില് വിധിച്ചിട്ടുള്ള യജ്ഞങ്ങള്- സോമയാഗം മുതലായവ ചെയ്യുന്നുണ്ടല്ലോ. അവയെല്ലാം സ്വീകരിക്കുന്നതും ഭക്ഷിക്കുന്നതും അവയെ നടത്തുന്നതും ഞാനാണ്- ഈ കൃഷ്ണനാണ്. ആഹുതികളിലെ മന്ത്രങ്ങളില് യജ്ഞത്തിന്റെ ദേവതകളായി കാണുന്ന ഇന്ദ്രന്, ചിത്രന്, വരുണന് മുതലായ ദേവതകളെല്ലാം ഞാനാണ്- എന്റെ അംശങ്ങളാണ്; രൂപഭേദങ്ങള് മാത്രമാണ്. അവരെല്ലാം എന്റെ ഭൃത്യന്മാരാണ്, ആ ദേവതകളാണ് എനിക്ക് ആഹുതികള് എത്തിച്ചുതരുന്നത്. യജ്ഞങ്ങളുടെ പുണ്യഫലവും തരുന്നത് ഞാനാണ്, ദേവന്മാര് വഴിതരുന്നു എന്നുമാത്രം. നിങ്ങള് ഗണപതി, സുബ്രഹ്മണ്യന്, ശിവന് തുടങ്ങിയ ദേവന്മാരെ പൂജിക്കാറുണ്ടല്ലോ. ആ പൂജ ഏറ്റുവാങ്ങുന്നതും ഫലം തരുന്നതും ദേവന്മാര് വഴി ഞാന് തന്നെയാണ്. ഈ കൃഷ്ണന് തന്നെയാണ് വ്രതങ്ങളും തീര്ത്ഥയാത്ര, ദാനം, ഉപവാസം മുതലായ തപസ്സുകളുടെയും ഫലം തരുന്നത്.
നമ്മുടെ സുഹൃത്തായി സ്ഥിതിചെയ്ത്, നമ്മുടെ ഹിതം മാത്രം ചെയ്യുന്ന വ്യക്തിയെ നമ്മള് സ്നേഹിക്കുകയും സേവിക്കുകയും എപ്പോഴും, വിവിധ ചിത്രങ്ങള് സമ്പാദിക്കുകയും സുഹൃത്തിനെ അറിഞ്ഞുകൊണ്ടിരിക്കുകയും ചെയ്തുകൊണ്ടിരുന്നാലേ മനസ്സിന് ശാന്തി ലഭിക്കുകയുള്ളൂ.
പ്രതികരിക്കാൻ ഇവിടെ എഴുതുക: