കൊച്ചി: ബിയര് പാര്ലറുകളില് നിന്ന് ബിയര് വാങ്ങി പുറത്തു കൊണ്ടുപോയി കഴിക്കാനാവില്ലെന്നും ഇത്തരത്തില് ചില്ലറ വില്പന നടത്താന് ബിവറേജസ് കോര്പ്പറേഷനും കണ്സ്യൂമര് ഫെഡിനും മാത്രമാണ് അവകാശമെന്നും ഹൈക്കോടതി വ്യക്തമാക്കി.
പാര്ലറുകളില് നിന്ന് ബിയര് വാങ്ങി പുറത്തേക്ക് കൊണ്ടുപോകുന്നത് നിയമവിരുദ്ധമല്ലെന്ന സിംഗിള്ബെഞ്ചിന്റെ ഉത്തരവിനെതിരെ സര്ക്കാര് നല്കിയ അപ്പീലിലാണ് ഡിവിഷന് ബെഞ്ചിന്റെ ഉത്തരവ്.
പാര്ലറില് നിന്ന് വാങ്ങുന്ന ബിയര് അവിടെ വച്ച് ഉപയോഗിക്കണം. ബിയര് പാര്ലറില് നിന്ന് മൂന്ന് ബോട്ടില് വാങ്ങി പുറത്തുകൊണ്ടുപോയതു പിടികൂടിയ എക്സൈസ് അധികൃതര് കഴിഞ്ഞ ജൂണ് 19 ന് കാഞ്ഞിരപ്പള്ളിയിലെ എലഗന്സ് ഹോട്ടലിനെതിരെ നടപടി സ്വീകരിച്ചിരുന്നു.
ഇതു ചോദ്യം ചെയ്ത് ഹോട്ടല് അധികൃതര് നല്കിയ ഹര്ജിയില് ബിയര് വാങ്ങി പുറത്തുകൊണ്ടുപോകാന് നിയമ തടസമില്ലെന്നായിരുന്നു ഒക്ടോബര് 18 ന് സിംഗിള്ബെഞ്ചിന്റെ വിധി.
ഇതിനെയാണ് സര്ക്കാര് ഹൈക്കോടതിയില് ചോദ്യം ചെയ്തത്. ബിയര് പാര്ലര് അനുമതിക്കുള്ള എഫ്.എല് 11 ലൈസന്സിലെ വ്യവസ്ഥയില്, പാര്ലറില് നിന്നു വാങ്ങുന്ന ബിയര് അവിടെത്തന്നെ വച്ച് കഴിക്കണമെന്ന് നിഷ്കര്ഷിച്ചിട്ടുണ്ടെന്നു ചൂണ്ടിക്കാട്ടിയാണ് അപ്പീല് നല്കിയത്.
പ്രതികരിക്കാൻ ഇവിടെ എഴുതുക: