ചെറുവത്തൂര്: ചെറുവത്തൂര് ടെലിഫോണ് എക്സ്ചെയ്ഞ്ച് ഓഫീസിനു പരിസരത്തെ ബി എസ് എന് എല്ലിന്റെയും രണ്ടു സ്വകാര്യ ടെലിഫോണ് കമ്പനികളുടെയും ഷെയറിംഗ് സൈറ്റ് അഗ്നിക്കിരയായി. റിലയന്സ് ജിയോ, എയര്ടെല്, ബി.എസ്.എന്.എല് എന്നീ നെറ്റ് വര്ക്കുകളുടെ ഷെയറിങ് സൈറ്റാണ് അഗ്നിക്കിരയാക്കിയത്. റെയില്വേ മേല്പ്പാലത്തിന് താഴെയായി ചുറ്റുമതിലോടുകൂടി പ്രവര്ത്തിക്കുന്ന ടെലഫോണ് എക്സ്ചേഞ്ച് കോമ്പൗണ്ടിനകത്തുവെച്ചാണ് സംഭവം.ഏകദേശം അരക്കോടി രൂപയുടെ നഷ്ടം സംഭവിച്ചതായി കണക്കാക്കപ്പെടുന്നു. ഇന്നലെ പുലര്ച്ചെയാണ് സംഭവമെന്നു കരുതുന്നു.ജിയോയ്ക്ക് 24 ലക്ഷവും എയര്ടെല്ലിന് 14 ലക്ഷവും ബി.എസ്.എന്.എല്ലിന് 11 ലക്ഷം രൂപയുടേയും നഷ്ടമാണ് സംഭവിച്ചത്. ജിയോ, എയര്ടെല് എന്നിവയുടെ മൂന്ന് സൈറ്റുകള് തകരാറിലായിട്ടുണ്ട്. ബി.എസ്.എന്.എല്ലിന്റെ ഫോണ്, ഇന്റര്നെറ്റ് എന്നിവ ചെറുവത്തൂരും പരിസരങ്ങളിലും ഭാഗികമായി മാത്രമേ പ്രവര്ത്തിക്കുന്നുള്ളൂ. ഇന്നലെ പുലര്ച്ചെ ഉണ്ടായ അപകട അലാറം കേട്ട് എത്തിയ സെക്യൂരിറ്റി ജീവനക്കാരനും പരിസരവാസികളും അന്വേഷണം നടത്തുന്നതിനിടയിലാണ് ബി എസ് എന് എല് അടക്കമുള്ള വിവിധ കമ്പനികളുടെ കേബിളുകളും മറ്റു ക്രമീകരണങ്ങളുമടങ്ങുന്ന സൈറ്റ് കത്തുന്നത് ശ്രദ്ധയില്പ്പെട്ടത്. ഉടന് തന്നെ തീയണക്കാനുള്ള ശ്രമം നടത്തുകയും പോലീസിലും ഫയര്ഫോഴ്സിലും വിവരമറിയിക്കുകയായിരുന്നു.ഉടന് തന്നെ തീ അണക്കാന് കഴിഞ്ഞതിനാല് കൂടുതല് സ്ഥലങ്ങളിലേക്ക് പടരുന്നത് തടയാന് കഴിഞ്ഞു. പോലീസിന്റെ അന്വേഷണത്തില് സംഭവ സ്ഥലത്തുനിന്നും കേബിള് കത്തിക്കാന് ഉപയോഗിച്ച ചകിരി,ഉണങ്ങിയ തെങ്ങോല, തുടങ്ങിയവ കണ്ടെടുത്തിട്ടുണ്ട്.ജിയോവിനാണ് ഏറ്റവും കൂടുതല് നഷ്ടം സംഭവിച്ചത്. ഈ കമ്പനിയുടെ സര്വ്വീസ് പൂര്വസ്ഥിതി പ്രാപിക്കാന് രണ്ടു ദിവസമെടുക്കുമെന്നാണ് ഒരു ഉയര്ന്ന ഉദ്യോഗസ്ഥന് പറഞ്ഞത്. എറണാകുളത്തുനിന്നും പുതിയ കേബിളുകളും അനുബന്ധ ഉപകരണങ്ങളും എത്തിയാലേ സര്വ്വീസ് പുനരാരംഭിക്കാന് കഴിയുള്ളൂ.
പ്രതികരിക്കാൻ ഇവിടെ എഴുതുക: