കുമരകം: വാര്ഷിക പദ്ധതിയില് ഇല്ലാത്ത പദ്ധതിയുടെ പേര് പറഞ്ഞ് ജനങ്ങളെ തെറ്റിദ്ധരിപ്പിച്ച് പാര്ട്ടിപരിപാടിക്ക് ആളെ കൂട്ടുന്ന സിപിഎമ്മിന്റെ കബളിപ്പിക്കലിനെതിരെ ബിജെപി കുമരകം പഞ്ചായത്ത് കമ്മറ്റി പ്രതിഷേധിച്ചു.
കഴിഞ്ഞ ദിവസം കെഎസ്കെടിയു വിന്റെ നേതൃത്വത്തില് ഭൂരഹിത, ഭവനരഹിതരായവരെ പങ്കെടുപ്പിച്ചുകൊണ്ടുള്ള പരിപാടി കുമരകത്ത് നടന്നിരുന്നു. എന്നാല് ഈ പരിപാടിക്ക് ആളെ കൂട്ടുവാന് സിപിഎം നേതാക്കളുടെ നേതൃത്വത്തില് നടന്ന തെറ്റിദ്ധാരണാജനകമായ പ്രചരണമാണ് പ്രതിഷേധത്തിനിടയാക്കിയത്. ഭൂമിയും വീടും ഇല്ലാത്തവരും ആവശ്യമുള്ളവരും പരിപാടിയില് എത്തണമെന്നും അവിടെ രജിസ്റ്റര് ചെയ്യുമ്പോള് കിട്ടുന്ന അപേക്ഷാഫോം പൂരിപ്പിച്ച് നല്കണമെന്നുമായിരുന്നു പ്രചരണം. ചെന്നവരുടെ പക്കല്നിന്നും 20രൂപയും വാങ്ങി ഫോം നല്കി. കുടുംബവിവരങ്ങള് രേഖപ്പെടുത്തുന്ന തരത്തില് ഫോട്ടോ കോപ്പികള് നല്കിയാണ് ജനങ്ങളെ കബളിപ്പിച്ചത്. പരിപാടി ഔദ്യോഗികമാണെന്ന് വരുത്താന് ത്രിതല പഞ്ചായത്തിലെ ഇടതുപക്ഷ ഭരണകര്ത്താക്കളാണ് നേതൃത്വം നല്കിയത്. 100 കണക്കിന് പാവപ്പെട്ട വയോവൃദ്ധരാണ് വാഗ്ദാനങ്ങള് കേട്ട് പരിപാടിക്കെത്തിയത്.
പാവപ്പെട്ടവരുടെ ദുരവസ്ഥ ചൂഷണം ചെയ്ത് വഞ്ചിക്കുന്ന സിപിഎമ്മിന്റെ കള്ളപ്രചരണം അവസാനിപ്പിക്കണമെന്നും ജനങ്ങളോട് മാപ്പ് പറയുവാന് സിപിഎം നേതാക്കളും ഭരണകര്ത്താക്കളും തയ്യാറാകണമെന്നും ബിജെപി ആവശ്യപ്പെട്ടു. ഇക്കാര്യം ജനങ്ങളെ ബോധ്യപ്പെടുത്തുവാന് ബൂത്ത് തലത്തില് സമ്പര്ക്ക പരിപാടി നടത്തുവാനും യോഗം തീരുമാനിച്ചു. ബിജെപി കുമരകം പഞ്ചായത്ത് കമ്മിറ്റി പ്രസിഡന്റും പഞ്ചായത്തംഗവുമായ പി.കെ. സേതു അദ്ധ്യക്ഷത വഹിച്ചു. മണ്ഡലം പ്രസിഡന്റ് കെ.ജി. ജയചന്ദ്രന് ഉദ്ഘാടനം ചെയ്തു. ജനറല് സെക്രട്ടറി ആന്റണി അറയില്, സെക്രട്ടറിമാരായ വി.എന്. ജയകുമാര്, അഡ്വ. ജോഷി ചീപ്പുങ്കല്, പി.എം. ബിനോയ്, വിനോദ്, പ്രശാന്ത് എന്നിവര് പ്രസംഗിച്ചു.
പ്രതികരിക്കാൻ ഇവിടെ എഴുതുക: