രാമായണം, മഹാഭാരതം എന്നീ പുരാണങ്ങളിലെ കഥാപാത്രങ്ങളുമായി ബന്ധപ്പെട്ട ഓരോ സംഭവങ്ങളുടെ സന്ദര്ഭങ്ങളില് അവര്ക്കൊക്കെ എത്രമാത്രം പ്രായമുണ്ടായിരുന്നു എന്നു കണ്ടെത്തുവാന് കവികള് അവസരം പരിമിതമായേ തന്നിട്ടുള്ളൂ. ചില സന്ദര്ഭങ്ങളില് ഇന്ന ആള്ക്ക് ഇത്ര വയസ്സുണ്ടായിരുന്നു എന്ന തരത്തിലുള്ള ചില സൂചനകളേ നമുക്ക് ലഭിച്ചിട്ടുള്ളൂ.
രാമായണം ബാലകാണ്ഡത്തില് 20-ാമത് അദ്ധ്യായത്തില് രാമന് വിശ്വാമിത്രനോടൊപ്പം രാക്ഷവധത്തിന് വനത്തിലേക്ക് തിരിക്കുന്ന അവസരത്തില് അദ്ദേഹത്തിന് 16 വയസ്സായിരുന്നുവെന്ന് രേഖപ്പെടുത്തിയിട്ടുണ്ട്. തിരിച്ചുവരുന്നവഴി സീതാസ്വയംവരം കഴിഞ്ഞു. അപ്പോള് രാമന് വയസ്സ് 17. പട്ടാഭിഷേകത്തിന് വിഘ്നം സംഭവിക്കയും വനവാസത്തിനിറങ്ങിത്തിരിക്കുകയും ചെയ്യുമ്പോള് വയസ്സ് 18. പത്മപുരാണത്തിലും അപ്പോള് വയസ്സ് പതിനെട്ടെന്ന് രേഖപ്പെടുത്തിയിരിക്കുന്നു.
ക്ഷത്രിയാചാരമനുസരിച്ച് 11-ാം വയസ്സില് ഉപനയനം കഴിച്ചിട്ടുണ്ടാകാം.
വനവാസയാത്രാരംഭത്തില് ഉപനയനം കഴിഞ്ഞ് 17 വര്ഷം കഴിഞ്ഞിരിക്കുന്നുവെന്ന് കൗസല്യ പറയുന്നു. അതുകൊണ്ട് വനയാത്രാരംഭത്തില് ശ്രീരാമന് (11+17) 28 വയസ്സ് ആയിരിക്കണം.
സീതാപഹരണത്തിന് പ്രച്ഛന്നവേഷധാരിയായി സീതയുടെ അടുക്കലെത്തിയ രാവണന് സീതയോട് കുശലങ്ങള് ചോദിക്കവെ സീത പറയുന്നു – ദശരഥന്റെ കൊട്ടാരത്തില് എല്ലാ സുഖഭോഗൈശ്വര്യങ്ങളും അനുഭവിച്ചുകൊണ്ട് ഞാന് 12 വര്ഷക്കാലം കഴിച്ചുകൂട്ടി. 13-ാം വര്ഷം അഭിഷേക വിഘ്നവശാല് കാട്ടിലേക്ക് പോന്നു. അന്ന് എന്റെ ഭര്ത്താവ് രാമന് ഇരുപത്തഞ്ച് വയസ്സ്. അപ്പോള് എന്റെ ജനനശേഷം 18 വര്ഷങ്ങള് കഴിഞ്ഞിരുന്നു. സീതാപഹരണ സമയത്ത് സീതയ്ക്ക് 30 വയസ്സെന്നു വരുന്നു; രാമന് 40 വയസ്സും.
വനയാത്രാരംഭത്തിലെ രാമന്റെ പ്രായം കൃത്യമായി പറയാന് ഈ അഭിപ്രായങ്ങളില്ക്കൂടി പറ്റുന്നില്ലെങ്കിലും രാമനേക്കാള് സീത 10 വയസ്സിന് ഇളപ്പമായിരുന്നുവെന്ന് മനസ്സിലാക്കാം.
പ്രതികരിക്കാൻ ഇവിടെ എഴുതുക: