ശബരിമല: ശബരിമല പ്രസാദങ്ങള് ലഭ്യമാക്കുമെന്ന വാഗ്ദാനവുമായി ഓണ്ലൈന് കമ്പനി. ഹൈദരാബാദ് ആസ്ഥാനമായ ബുക്ക് മൈ ദര്ശന് എന്ന സ്വകാര്യ ഓണ്ലൈന് കമ്പനിയാണ് വെബ്സൈറ്റിലൂടെ ഈ വാഗ്ദാനം നല്കിയിട്ടുള്ളത്.
ശബരിമല പ്രസാദം സ്വകാര്യ ഏജന്സികള് മുഖേന വിതരണം ചെയ്യാന് അനുമതിയില്ലെന്നിരിക്കെയാണിത്. ഹൈദരാബാദ് ജൂബിലി ഹില്സിലെ കോര്പ്പറേറ്റ് ഓഫീസിന്റെ വിലാസവും വിജയവാഡ, ശ്രീശൈലം, മന്ത്രാലയം, ബസാറ, വേമുല്വാഡ, ശ്രീകാളഹസ്തി അണ്ണാവരം, തിരുപ്പതി, ഷിര്ദി എന്നിവയ്ക്കുപുറമെ ശബരിമലയിലും ബ്രാഞ്ച് ഓഫീസുകള് പ്രവര്ത്തിക്കുന്നതായും സൈറ്റില് പറയുന്നു.
639 രൂപയാണ് ഒരു പ്രസാദക്കിറ്റിന്റെ വില. രണ്ട് ടിന് അരവണ, അഭിഷേകം ചെയ്ത നെയ്യ്, അയ്യപ്പചിത്രം, നാല് കങ്കണം എന്നിവ അടങ്ങുന്നതാണ് കിറ്റ്. പാക്കേജ് നിരക്ക്, സര്ക്കാര് നികുതി, കടത്ത് നിരക്ക് എന്നിവയടക്കമാണ് 639 രൂപ. ശബരിമല പ്രസാദം ഓണ്ലൈന് വഴി വിതരണം ചെയ്യാനുള്ള ഏക അംഗീകൃത ഏജന്സി ധനലക്ഷ്മി ബാങ്കാണ്. 375, 225 രൂപ നിരക്കില് രണ്ടുതരം കിറ്റുകള് സന്നിധാനത്തുനിന്ന് വിതരണം ചെയ്യുന്നുണ്ട്. ഇതിനിടയിലാണ് ഇരട്ടിയിലേറെ തുക ഈടാക്കിയുള്ള സ്വകാര്യ ഏജന്സിയുടെ നടപടി.
ഇതിനുപുറമെ പരിസ്ഥിതി സൗഹൃദ ഇരുമുടിക്കെട്ടും ലഭ്യമാക്കുമെന്ന് ഏജന്സിയുടെ പരസ്യം പറയുന്നു. 27 ഇനങ്ങളടങ്ങിയ ഇരുമുടിക്കെട്ടിന് 378 രൂപയാണ്.
പ്രസാദവിതരണം കെല്ട്രോണിനെ ഏല്പ്പിക്കാന് ധാരണയായിരുന്നുവെങ്കിലും അതും ഇതുവരെ നടപ്പായിട്ടില്ല. എന്നാല്, ബുക്ക് മൈ ദര്ശന് എങ്ങനെയാണ് ഇത്രയേറെ പ്രസാദം ലഭ്യമാകുന്നതെന്ന കാര്യത്തില് വ്യക്തതയില്ല.
പ്രതികരിക്കാൻ ഇവിടെ എഴുതുക: