ആലുവ: ഹോണ്ടയുടെ ആലുവ ഷോറൂമിലുണ്ടായ തീപിടിത്തത്തില് 15 പുതിയ ഇരുചക്ര വാഹനങ്ങള് കത്തി നശിച്ചു. ലക്ഷക്കണക്കിന് രൂപയുടെ നഷ്ടം സംഭവിച്ചതായി കണക്കാക്കുന്നു. ദേശീയപാതയില് പുളിഞ്ചോടിന് സമീപം ആര്യഭംഗി ഹോണ്ടയില് ഇന്നലെ പുലര്ച്ചെ നാലരയോടെയാണ് തീപിടിത്തമുണ്ടായത്. കെട്ടിടത്തിന്റെ മുകളിലെ നിലയിലായിരുന്നു തീ പിടിച്ചത്. ഡിസ്പ്ലേക്കായി സൂക്ഷിച്ചിരുന്ന ഹോണ്ടയുടെ വിവിധ മോഡലുകളിലുള്ള ഇരുചക്ര വാഹനങ്ങള് കത്തി നശിച്ചു. നിരവധി കമ്പ്യൂട്ടറുകള്, ഓഫീസ് ഫര്ണിച്ചറുകള്, മേല്ക്കൂരയിലെ ഇന്റീരിയല് വര്ക്കുകള്, ഗ്ലാസുമെല്ലാം കത്തി നശിച്ചു. താഴെ ഉറക്കത്തിലായിരുന്ന സെക്യൂരിറ്റി ജീവനക്കാരന് ശബ്ദവും ചൂടും സഹിക്കാനാവാതെ ഉറക്കമുണര്ന്നപ്പോഴാണ് തീപിടിത്ത വിവരമറിഞ്ഞത്.
ആലുവ അഗ്നിശമന സേനാ എത്തിയാണ് തീയണച്ചത്. വൈദ്യുതി ഷോര്ട്ട് സര്ക്ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. കെട്ടിടത്തിന്റെ താഴത്തെ നിലയില് സ്പെയര് പാര്ട്ട്സ് സെന്ററും സര്വീസ് സ്റ്റേഷനുമാണ്. ഇവിടെ പഴയ വാഹനങ്ങളും പാര്ട്ട്സുകളും സൂക്ഷിച്ചിരുന്നു. ഇങ്ങോട്ട് തീ പടരുന്നതിന് മുമ്പേ അണച്ചു. ആലുവ ഫയര് സ്റ്റേഷന് ഇന് ചാര്ജ് വി.എസ്. സുകുമാരന്, ഫയര്മാന്മാരായ ടി.കെ. എല്ദോസ്, പി.ആര്. ബാബു, ജോസഫ് ബാബു, ശ്രീദാസ്, അനൂപ് എന്നിവരുടെ നേതൃത്വത്തിലാണ് തീയണച്ചത്.
പ്രതികരിക്കാൻ ഇവിടെ എഴുതുക: