പനമരം : പനമരം ഗവ. ഹയര് സെക്കന്ററി സ്കൂള് വജ്രജൂബിലി നിറവില്. പഴശ്ശി സമര ചരിത്രവുമായി ബന്ധപ്പെട്ട പനമരം കോട്ടയില് സ്ഥിതിചെയ്യുന്ന ഈ സ്കൂള്, തലക്കര ചന്തുവിന്റെ ധീരസ്മൃതികളുണര്ത്തുന്ന പുണ്യഭൂമികയാണ്. 1957 ജൂലൈ നാലിന് പനമരം എല്പി സ്കൂളിനോട് ചേര്ന്ന് ഹൈസ്കൂള് ആരംഭിച്ചു. ആദ്യ ഹെഡ്മാസ്റ്റര് ശങ്കരന് കുട്ടി മേനോന് ആയിരുന്നു. അന്നത്തെ പഞ്ചായത്ത് പ്രസിഡണ്ടായിരുന്ന ചന്ദ്രപ്പ ഗൗഡര്, പൗര പ്രമുഖനായിരുന്ന സി.എന് അപ്പുനായര് തുടങ്ങിയ നിരവധി പേര് ഈ സ്കൂളിന്റെ ആരംഭത്തിനും വളര്ച്ചക്കും ഏറെ പ്രയത്നിച്ചവരാണ്. 1997 ല് ഹയര് സെക്കണ്ടറിയായി ഉയര്ത്തി. മുന് എംഎല്എ രാഘവന്, സി.കെ.ശശീന്ദ്രന് എം എല്എ എന്നിവര് ഈ സ്കൂളിന്റെ അഭിമാനമായ പൂര്വ്വ വിദ്യാര്ത്ഥികളാണ്. ജില്ലയിലെ ഏക സര്ക്കാര് പ്രീമെട്രിക് സ്കൂളും പനമരം ഹയര് സെക്കന്ററി സ്കൂളാണ്. മാത്രമല്ല ആകെ വിദ്യാര്ത്ഥികളുടെ 40 ശതമാനത്തോളം പട്ടികജാതി പട്ടികവര്ഗ്ഗ വിദ്യാര്ത്ഥികളാണ് ഈ സ്കൂളില് അധ്യയനം നടത്തുന്നത്. ഒരാണ്ട് നീളുന്ന ആഘോഷപരിപാടികള്ക്ക് ഇന്ന് തുടക്കമാകും.
വജ്രജൂബിലി ആഘോഷ പരിപാടികളുടെ ഉദ്ഘാടനം വൈകീട്ട് മൂന്ന് മണിക്ക് ജില്ലാ പോലീസ് മേധാവി ജി.ശിവവിക്രം നിര്വ്വഹിക്കുന്നു. സ്കൂള് പി.ടി.എ പ്രസിഡണ്ട് ഇബ്രാഹീം പടയന് അധ്യക്ഷത വഹിക്കും. ഡോ. ആര്.സി.കരിപ്പത്ത് മുഖ്യപ്രഭാഷണവും, ജില്ലാ വിദ്യാഭ്യാസ ഉപ ഡയറക്ടര് പി.പി.തങ്കം വിരമിക്കുന്ന അധ്യാപകരെ ആദരിക്കുകയും, ജില്ലാ വിദ്യാഭ്യാസ ഓഫീസര് കെ. പ്രഭാകരന് ദേശീയ-സംസ്ഥാന തല മേളകളിലെ വിജയികളെ അനുമോദിക്കുകയും ചെയ്യും. പനമരം ഗവ. ടി.ടി.ഐ. പ്രിന്സിപ്പല് കെ.ടി ജോസ,് പനമരം ഗവ. എല്. പി. സ്കൂള് പ്രധാനാധ്യാപകന് ചാക്കോ പ്രകാശ്, പൂര്വ്വ വിദ്യാര്ത്ഥി സംഘടനാ പ്രസിഡണ്ട് എം. സി. സെബാസ്റ്റ്യന്, ഐ.ടി@സ്കൂള് ജില്ലാ കോ-ഓഡിനേറ്റര് വി.ജെ തോമസ്, എം.പി.ടി.എ പ്രസിഡണ്ട് റഹീന, മുന് പി.ടി.എ പ്രസിഡണ്ട് എം. കുഞ്ഞമ്മദ്, വ്യാപാരി വ്യവസായി പനമരം യൂണിറ്റ് സെക്രട്ടറി കെ.ടി. ഇസ്മായില്, സീനിയര് ഹയര് സെക്കണ്ടറി അധ്യാപിക ഷാലി തോമസ്, സ്കൂള് സ്റ്റാഫ് സെക്രട്ടറി ടി.ടി ജെയിംസ്, സ്റ്റുഡന്റ്സ് കൗണ്സില് ചെയര്മാന് മാസ്റ്റര് നവീന് നോയല് ജോസഫ്, കണ്വീനര് കെ.എം.കുഞ്ഞിക്കണ്ണന് എന്നിവര് പ്രസംഗിക്കും.
ദേശീയ ശാസ്ത്രനാടക പുരസ്കാരം നേടിയ ‘പച്ച’ നാടകാവതരണവും സംസ്ഥാന പുരസ്കാരം നേടിയ ‘വട്ടപ്പാട്ടും’ കുട്ടികളുടെ വിവിധ കലാപരിപാടികളും തുടര്ന്ന് നടക്കുന്നു. പൊതുസമ്മേളനത്തിലേക്കും മുഴുവന് ആഘോഷ പരിപാടികളിലേക്കും എല്ലാവരുടെയും സാന്നിദ്ധ്യസഹകരണങ്ങള് ഉണ്ടാകണമെന്ന് സ്കൂള് അധികൃതര് അഭ്യര്ത്ഥിച്ചു.
പ്രതികരിക്കാൻ ഇവിടെ എഴുതുക: