സംസ്കൃതിയില് രാമായണത്തെ അധികരിച്ചുള്ള ചോദ്യോത്തര പംക്തിയില് അദ്ധ്യാത്മ രാമായണത്തിന്റെ രചയിതാവ് ആര് എന്ന ചോദ്യത്തിന് വേദവ്യാസമഹര്ഷി എന്ന് വി.ആര്. ഗോപിനാഥന് നായര് (തലവടി) നല്കിയിട്ടുള്ള ഉത്തരം പല കാരണങ്ങള്കൊണ്ടും ശരിയാവാന് സാധ്യതയില്ലെന്നും ആ നിലയ്ക്ക് യഥാര്ത്ഥത്തില് ആരായിരിക്കാം അദ്ധ്യാത്മരാമായണത്തിന്റെ രചയിതാവ് എന്ന ചോദ്യം വീണ്ടും ഉന്നയിച്ചുകൊണ്ടും ഏറ്റുമാനൂരില്നിന്നും ആര്. ഗോപാലകൃഷ്ണന് നായര് 10.02.17 ലെ ജന്മഭൂമിയില് പ്രസിദ്ധീകരിച്ചിട്ടുള്ള കത്ത് കണ്ടു. അദ്ദേഹത്തിന്റെ സംശയനിവൃത്തി വരുത്തുന്നതിനാണ് ഈ കത്ത്.
എന്റെ അഭിപ്രായത്തില് ഈ വിഷയത്തില് പൊതുവേയുള്ള ഒരു ധാരണയാണ് ഗോപിനാഥന് നായര് നല്കിയിട്ടുള്ളത്, എന്നാണ്. ആ നിലയ്ക്ക് ആ ഉത്തരം അസ്വീകാര്യമായി കരുതേണ്ടതുമില്ല. എന്നാല് അദ്ധ്യാത്മരാമായണത്തിന്റെ കര്ത്താവിനെപ്പറ്റി പണ്ഡിതന്മാരുടെ ഇടയില് കൃത്യമായ ഒരു ധാരണ ഇന്നും ഉണ്ടായിട്ടില്ല.
പക്ഷേ ഈ അടുത്തകാലത്ത് ഞാന് നടത്തിയ ഗവേഷണ-പഠനങ്ങളുടെ വെളിച്ചത്തില് കണ്ടെത്തിയിട്ടുള്ളത് സംസ്കൃതത്തിലുള്ള അദ്ധ്യാത്മരാമായണം മൂലകൃതിയുടെ രചയിതാവ്, വടക്കേ ഇന്ത്യയില് 15 ഉം 16 ഉം നൂറ്റാണ്ടുകളില് ഉദ്ഗമിച്ച ഭക്തി ആന്ദോളനമെന്ന സാംസ്കാരിക വിപ്ലവത്തിന്റെ അധിനായകസ്ഥാനം അലങ്കരിച്ചിരുന്ന രാമാനന്ദന് എന്നയതീശ്വരനായിരുന്നു, എന്നാണ്. ഇദ്ദേഹം അദ്ധ്യാത്മ രാമായണം രചിച്ച് അതിന്റെ ഒരു പകര്പ്പുമായി കാശിയിലെത്തി ആ ഗ്രന്ഥം അവിടെ പ്രചരിപ്പിക്കുക മാത്രമല്ല, ഭക്തി പ്രസ്ഥാനത്തിനാകത്തന്നെ അടിത്തറ പാകുകയും ചെയ്ത മഹാനാണ്. ഇദ്ദേഹം കേരളീയനും ശാങ്കര പരമ്പരയില്പ്പെട്ട അദ്വൈതവാദിയുമായിരുന്നു.
ഇദ്ദേഹം വളരെ ചെറുപ്പത്തില് തന്നെ സന്യാസം സ്വീകരിക്കുകയും മഹാകവി എഴുത്തച്ഛന്റെയും മറ്റും ആചാര്യസ്ഥാനീയനുമായിരുന്നു. ഈ അനര്ഘ കാവ്യത്തിന്റെ ഒരു കോപ്പി എഴുത്തച്ഛന് നല്കിയിട്ടാണ് അദ്ദേഹം കാശിയിലേക് പോയത്. ഈ കാര്യങ്ങളെല്ലാം എന്റെ ‘ഹിന്ദുധര്മ സ്വരൂപം’ എന്ന കൃതിയില് വിശദമായി പ്രതിപാദിച്ചിട്ടുണ്ട്. അതിലെ പ്രസക്ത ഭാഗങ്ങള് അനിഷേധ്യങ്ങളായ തെളിവുകളോടെ ഒരു ലേഖനമായി ഞാന് തയ്യാറാക്കിയിട്ടുണ്ട്.
പ്രതികരിക്കാൻ ഇവിടെ എഴുതുക: