ആലപ്പുഴ: ജില്ലയില് മൂന്നു അപകടങ്ങളിലായി നാലു പേര് മരിച്ചു. പുറക്കാട് ലോറിയില് കാറിടിച്ച് ബന്ധുക്കളായ രണ്ടുപേര് മരിച്ചു. തോട്ടപ്പള്ളിയില് വള്ളം മറിഞ്ഞ് മുങ്ങിത്താഴ്ന്ന ഭാര്യയെ രക്ഷിക്കുന്നതിനിടെ യുവാവ് മരിച്ചു. ഹരിപ്പാട് രാമപുരത്ത് കാല്നടയാത്രക്കാരനായ വൃദ്ധന് കാറിടിച്ചു മരിച്ചു. സ്ത്രീ ഉള്പ്പെടെ നാലുപേര്ക്ക് പരിക്കേറ്റു.
അമ്പലപ്പുഴ പുറക്കാട് ജങ്ഷനില് ഇന്നലെ പുലര്ച്ചെ രണ്ടിനായിരുന്നു അപകടം. കാര് ഓടിച്ചിരുന്ന കായംകുളം കൃഷ്ണപുരം കാപ്പില് മേക്ക് വേടന് തറയില് ദയാനന്ദന്- രാധാമണി ദമ്പതികളുടെ മകന് ദീപു (29), ഇവരുടെ ബന്ധു കോട്ടയം മാങ്ങാനം ചെമ്പകശ്ശേരി വീട്ടില് രാജന് (50) എന്നിവരാണ് മരിച്ചത്. കായംകുളം ഭാഗത്തേക്കു പോകുകയായിരുന്ന ലോറിയുടെ പിന്നില് കാര് ഇടിക്കുകയായിരുന്നു.
മരിച്ച ദീപുവിന്റെ ഭാര്യ ദേവിക (24)യെയും സഹോദരന് വിഷ്ണു (26)വിനെയും പരിക്കുകളോടെ കോട്ടയം മെഡിക്കല് കോളേജ് ആശുപത്രിയിലേക്ക് മാറ്റി. വിദേശത്തു നിന്ന് അവധിക്കു നാട്ടിലെത്തിയ വിഷ്ണുവിനെ എയര്പോര്ട്ടില് നിന്നും കൂട്ടിക്കൊണ്ടുവരുമ്പോഴായിരുന്നു അപകടം. ദേവികയുടെയും വിഷ്ണുവിന്റെയും മാതൃസഹോദരീഭര്ത്താവാണ് രാജന്. പെയിന്റിങ് കോണ്ട്രാക്ടറാണ്. ഭാര്യ ഗീത. മക്കള്: അരുണ. അപര്ണ. എട്ടുമാസം മുമ്പായിരുന്നു ദീപുവിന്റെയും ദേവികയുടെയും വിവാഹം.
തോട്ടപ്പള്ളിയില് വള്ളം മറിഞ്ഞ് യുവാവ് മരിച്ചു. ടിഎസ് കനാലില് ഇന്നലെ മൂന്നിനായിരുന്നു അപകടം. പുറക്കാട് ഏഴാം വാര്ഡില് നാലുചിറ പുത്തന്പറമ്പില് അപ്പുക്കുട്ടന്റെ മകന് അഖിലാ (27)ണ് മരിച്ചത്. മുങ്ങിത്താഴ്ന്ന ഭാര്യയെ രക്ഷപ്പെടുത്തുന്നതിനിടെയാണ് അപകടം. അഖിലും സഹോദരീ ഭര്ത്താവ് രാജീവന്, അമ്മാവന്റെ മകന് ഉണ്ണി, ഭാര്യ ഉണ്ണിമായ എന്നിവരും വള്ളത്തില് മറുകരയ്ക്കു പോകുന്നതിനിടെ കനാലിന്റെ മദ്ധ്യഭാഗത്ത് വള്ളം മറിയുകയായിരുന്നു.
ഈ സമയം മുങ്ങിത്താഴാന് തുടങ്ങിയ ഉണ്ണിമായയെ ഉണ്ണിയും അഖിലും ചേര്ന്ന് കരയിലേക്ക് എത്തിക്കുന്നതിനിടെ അഖില് മുങ്ങിത്താഴുകയായിരുന്നു. സംഭവം കണ്ട് ഓടിക്കൂടിയ നാട്ടുകാര് ഉണ്ണിമായയെ കരയ്ക്കെത്തിച്ചെങ്കിലും അഖിലിനെ രക്ഷിക്കാനായില്ല. വിദേശത്ത് ജോലിയായിരുന്ന അഖിലിന്റെ വിവാഹം കഴിഞ്ഞ മാസമായിരുന്നു. അമ്മ: ഉഷ. സഹോദരി: ആര്യ.
ഹരിപ്പാട് രാമപുരത്ത് ഇന്നലെ ഉച്ചയ്ക്ക് 12.30ന് നിയന്ത്രണം വിട്ട കാറിടിച്ചാണ് വൃദ്ധന് മരിച്ചത്. ചിങ്ങോലി ചിങ്ങനല്ലൂര് ലക്ഷ്മീ നാരായണ സദനത്തില് കൊച്ചുപുരയ്ക്കല് നാരായണപിള്ള (79)യാണ് മരിച്ചത്. ഭാര്യ: ലക്ഷ്മിക്കുട്ടിയമ്മ: മകന് : സത്യപാലന് (സൗദി). മരുമകള്: ശ്രീലത.
പ്രതികരിക്കാൻ ഇവിടെ എഴുതുക: