കോഴഞ്ചേരി: എംജി സര്വ്വകലാശാല കലോത്സവം നൂപുര 2017 കോഴഞ്ചേരിയില് തിരിതെളിഞ്ഞു. പഞ്ചായത്ത് സ്റ്റേഡിയത്തിലെ ഒഎന്വി നഗറില് ചലച്ചിത്രതാരം പത്മശ്രീ ജയറാം കലോത്സവം ഉദ്ഘാടനം ചെയ്തു.
അറിയാന് വയ്യാത്തത് അറിയില്ലെന്ന് പറയാനും അതുമറ്റുള്ളവരില് നിന്ന് പഠിക്കാനുമുള്ള നല്ല മനസ്സ് എല്ലാവര്ക്കും ഉണ്ടാവണമെന്നും ഉദ്ഘാടന പ്രസംഗത്തില് ജയറാം ഓര്മ്മിപ്പിച്ചു. ഇന്ന് ലോകം നേരിടുന്ന ഏറ്റവും വലിയ പ്രശ്നം ഒരുശതമാനം അറിവും ബാക്കി 99 ശതമാനം ആ അറിവില് നിന്നുണ്ടാകുന്ന അഹങ്കാരവുമാണ്. അത് ഉണ്ടാകാതിരിക്കട്ടെയെന്നും അദ്ദേഹം പറഞ്ഞു. മത്സരം അസൂയക്ക് വഴിമാറി അക്രമത്തിലേക്ക് തിരിഞ്ഞ് കോടതി വരാന്തകളില് അവസാനിക്കാതിരിക്കാന് ശ്രദ്ധിക്കണം. ആരോഗ്യകരമായ മത്സരമാണ് വേണ്ടത്.
അതിലൂടെയേ വിജയമുണ്ടാകൂ. സ്ത്രീത്വത്തിന് നേരെ ഉണ്ടാകുന്ന അതിക്രമങ്ങള്ക്ക് തടയിടാന് യുവാക്കള് മുന്നിട്ടിറങ്ങണമെന്ന് സമീപകാല സംഭവം ഓര്മ്മിപ്പിച്ച് ജയറാം ആഹ്വാനം ചെയ്തു. ഇനി ഒരു സ്ത്രീക്കും ഇത്തരം അനുഭവങ്ങളുണ്ടാകാതിരിക്കാന് ആണുങ്ങളായവര് അനുവദിക്കരുതെന്നും അദ്ദേഹം പറഞ്ഞു. ജയറാമിന്റെ വാക്കുകളെ ജയാരവത്തോടെയാണ് വിദ്യാര്ത്ഥികളും ശ്രോതാക്കളും വരവേറ്റത്. യൂണിയന് ചെയര്മാന് അജയ്നാഥ് വി.അദ്ധ്യക്ഷം വഹിച്ചു. ആന്റോആന്റണി എംപി, പത്തനംതിട്ട ജില്ലാ പഞ്ചായത്ത് പ്രസിഡന്റ് അന്നപൂര്ണ്ണാദേവി, ചലച്ചിത്ര സംവിധായകന് എബ്രിഡ് ഷൈന്, സ്വാഗതസംഘം ചെയര്മാന് എ.പത്മകുമാറടക്കം നിരവധി പ്രമുഖര് ഉദ്ഘാടന ചടങ്ങില് സന്നിഹിതരായിരുന്നു.
ഉദ്ഘാടത്തിന് മുന്നോടിയായി കോഴഞ്ചേരി സെന്റ് തോമസ് കോളേജ് ജംങ്ഷനില് നിന്നും വര്ണാഭമായ സാംസ്കാരിക ഘോഷയാത്ര ആരംഭിച്ചു. വിവിധ കോളേജുകളില് നിന്നുള്ള വിദ്യാര്ത്ഥികള് അവതരിപ്പിച്ച നിശ്ചല ദൃശ്യങ്ങളും കേരളീയ കലാരൂപങ്ങളുടെ ദൃശ്യാവിഷ്ക്കാരവുമെല്ലാം ഘോഷയാത്രയ്ക്ക് മാറ്റേകി.
പ്രതികരിക്കാൻ ഇവിടെ എഴുതുക: