ന്യൂദല്ഹി: ”എന്റെ അച്ഛനെ നിങ്ങള് എന്തിനാണ് കൊന്നത്”? മാര്ക്സിസ്റ്റ് ഭീകരരോട് ഉള്ളുപിടഞ്ഞ് പന്ത്രണ്ടുകാരി വിസ്മയ ചോദിക്കുന്നു. ”ആര്എസ്എസ്സിനെയും ബിജെപിയെയും പിന്തുണച്ചു എന്നതാണ് എന്റെ അഛന് ചെയ്ത തെറ്റ്.
ഞങ്ങളുടെ ചോരയും കണ്ണീരും അവര്ക്ക് സന്തോഷം നല്കുന്നുണ്ടോ”?. മനുഷ്യത്വം മരവിച്ചിട്ടില്ലാത്തവരുടെ മനസ്സുലച്ച വിസ്മയയുടെ ഈ ചോദ്യം രാജ്യം ഏറ്റെടുത്തിരിക്കുകയാണിപ്പോള്. ദേശീയ മാധ്യമങ്ങളും നവമാധ്യമങ്ങളും വിസ്മയയുടെ വേദനക്കൊപ്പം നിന്ന് മരണവ്യാപാരികളായ മാര്ക്സിസ്റ്റുകാരോട് ചോദ്യം ആവര്ത്തിച്ചുകൊണ്ടേയിരിക്കുന്നു – അക്രമം ആദര്ശമാക്കിയവര്ക്ക് ഉത്തരം നല്കാനാകില്ലെന്ന് അറിഞ്ഞിട്ടും.
കണ്ണൂരില് മുഖ്യമന്ത്രി വിജയന്റെ മണ്ഡലത്തിലുള്പ്പെടുന്ന അണ്ടല്ലൂരില് സിപിഎം കൊലപ്പെടുത്തിയ സന്തോഷ് കുമാറിന്റെ മകളാണ് വിസ്മയ. മുഖ്യമന്ത്രിയുടെ പാ ര്ട്ടി തന്റെ ജീവിതം ഇരുട്ടിലാക്കിയതിനെ കുറിച്ച് ഹിന്ദിയില് എഴുതിയ പ്ലക്കാര്ഡുകളിലൂടെയാണ് അവള് രാജ്യത്തെ അറിയിച്ചത്.
വീഡിയോ ട്വിറ്ററിലും ഫേസ്ബുക്കിലും വൈറലായി. ലക്ഷക്കണക്കിന് ആളുകളാണ് വീഡിയോ കണ്ടത്. ഇതോടെ വിഷയം ദേശീയമാധ്യമങ്ങളും ഏറ്റെടുത്തു. എന്ഡിടിവി, സ്വരാജ്യ, ന്യൂസ് എക്സ്, ഡക്കാന് ക്രോണിക്കിള്, ഫിനാന്ഷ്യല് എക്സ്പ്രസ് ഇന്ത്യാ ടുഡേ തുടങ്ങി നിരവധി മാധ്യമങ്ങളില് വിസ്മയയുടെ ചോദ്യം ചര്ച്ചയായി. ”എന്റെ അച്ഛനെ മാത്രമല്ല, ഒരു കുടുംബത്തെ മുഴുവനാണ് അവര് കൊന്നത്”. വീഡിയോയില് വിസ്മയ പറയുന്നു.
ഒരു മലയാളം ചാനലില് വിസ്മയ പങ്കെടുത്ത ക്വിസ് പരിപാടിയുടെ വീഡിയോയും ‘വിസ്മയയുടെ കത്ത്’ എന്ന പേരില് മാധ്യമപ്രവര്ത്തകന് മനോജ് മനയില് എഴുതിയ കവിതയും സമൂഹമാധ്യമങ്ങളില് വൈറലായിരുന്നു. കേരളത്തിലെ സിപിഎമ്മിന്റെ കൊലപാതക രാഷ്ട്രീയം ദേശീയതലത്തില് സജീവചര്ച്ചയാണിപ്പോള്.
വിസ്മയ വീഡിയോയിലൂടെ പറഞ്ഞത്
എന്റെ പേര് വിസ്മയ. 12 വയസ്സ്. കണ്ണൂര് സ്വദേശി. കടമ്പൂര് എച്ച്എസ്എസ്സിലെ എട്ടാം ക്ലാസ് വിദ്യാര്ത്ഥിനി. ഗ്രാമത്തിലെ സാധാരണക്കാരെ സഹായിക്കുന്നതിന് ഐപിഎസ് ഓഫീസറാകാനായിരുന്നു എന്റെ ആഗ്രഹം. ഇത് നിറവേറ്റാന് അച്ഛന് വളരെയധികം ശ്രമിച്ചിരുന്നു. എന്നാല് ഒറ്റ രാത്രിയില് എന്റെ സ്വപ്നങ്ങള് എല്ലാം ഒലിച്ചുപോയി.
ആര്എസ്എസ്സിനെയും ബിജെപിയെയും പിന്തുണച്ചു എന്നതാണ് എന്റെ അച്ഛന് ചെയ്ത തെറ്റ്. എന്റെ ഭാവി ഇന്ന് ഇരുട്ടിലാണ്. അഛനെ മാത്രമല്ല ഒരു കുടുംബത്തെ മുഴുവനായാണ് അവര് കൊന്നത്. അവര് ഇല്ലാതാക്കിയത് എന്റെ സ്വപ്നങ്ങളും ഭാവിയുമാണ്, പ്രായമായ മുത്തശ്ശിയെയാണ്, ഞങ്ങളുടെ ഭക്ഷണവും വെള്ളവുമാണ്.
ഇരുട്ട് മാത്രമാണ് എനിക്കിപ്പോള് കാണാനാകുന്നത്. എന്തിനാണ് എന്റെ അഛനെ കൊന്നതെന്ന ചോദ്യത്തിന് ഇതുവരെ ഉത്തരം ലഭിച്ചില്ല. ഞങ്ങളുടെ ചോരയും കണ്ണീരും അവര്ക്ക് സന്തോഷം നല്കുന്നുണ്ടോ?.
പ്രതികരിക്കാൻ ഇവിടെ എഴുതുക: