കണ്ണൂര്: കണ്ണൂരില് ആദ്യമായി അപൂര്വ്വരക്തഗ്രൂപ്പായ ബോംബെ ഗ്രൂപ്പ് കണ്ടെത്തുന്നതിന് വേണ്ടിയുള്ള രക്തഗ്രൂപ്പ് നിര്ണയ ക്യാമ്പ് 25ന് കാലത്ത് പത്തിന് എകെജി ഹോസ്പിറ്റലില് വെച്ച് നടത്തുന്നു. എകെജി സഹകരണ ഹോസ്പിറ്റല്, റോട്ടറി ക്ലബ്ബ് ഓഫ് കാനന്നൂര് സീസൈഡ്, ബ്ലഡ് ഡോണേഴ്സ് കേരള ചാരിറ്റബിള് സൊസൈറ്റി, ഡി വൈ എഫ് ഐ കണ്ണൂര് ബ്ലോക്ക് കമ്മിറ്റി എന്നിവരുടെ സംയുക്ത സഹകരണത്തിലാണ് ക്യാമ്പ് സംഘടിപ്പിക്കുന്നത്. 25ന് കാലത്ത് ജില്ലാ കലക്ടര് മീര് മുഹമ്മദലി ക്യാമ്പ് ഉദ്ഘാടനം ചെയ്യുമെന്ന് സംഘാടകര് വാര്ത്താസമ്മേളനത്തില് അറിയിച്ചു. റോട്ടറി ഗവര്ണര് ഡിസ്ട്രിക്ട് 3202 ഡോ ജയപ്രകാശ് ഉപാദ്ധ്യ വിശിഷ്ടാതിഥിയായിരിക്കും.
ഒ ഗ്രൂപ്പുകാരില് നിന്നാണ് ബോംബേ രക്തഗ്രൂപ്പ് നിര്ണയിക്കപ്പെടുന്നത്. വ്യത്യസ്തമായ അപകടങ്ങള്, അത്യാഹിതങ്ങള് എന്നിവ പറ്റി വരുന്നവര്ക്കും അടിയന്തിര ഘട്ടങ്ങളിലും ഒട്ടേറെപ്പേര്ക്ക് ഇത്തരത്തിലുള്ള രക്തഗ്രൂപ്പുകള് ആവശ്യമായി വരികയാണ്. ഇത്തരത്തില്പ്പെട്ട ആവശ്യക്കാര്ക്ക് ഏത് സമയത്തും രക്തം ലഭ്യമാകുന്ന സ്ഥിതിയില് അപൂര്വ്വ ഗ്രൂപ്പില്പ്പെട്ട ദാതാക്കളെ കണ്ടെത്തി രക്തദാനസേന രൂപീകരിക്കുകയെന്നാണ് ക്യാമ്പ് കൊണ്ട് ഉദ്ദേശിക്കുന്നത്. മഹാരാഷ്ട്രയിലും അതിനോട് ചേര്ന്ന കര്ണാടകയുടെ ചില പ്രദേശങ്ങളിലുമാണ് ബോംബേ ഒ പോസറ്റീവ് രക്തം ഉള്ളവരെ കൂടുതലായി തിരിച്ചറിഞ്ഞിട്ടുള്ളത്. അതിനാലാണ് ഈ രക്തഗ്രൂപ്പിന് ബോംബേ ഗ്രൂപ്പ് എന്ന് പേര് വരാന് കാരണമായത്. വാര്ത്താസമ്മേളനത്തില് എകെജി ആശുപത്രി സെക്രട്ടറി കെ.വികാസ്, റോട്ടറി ക്ലബ്ബ് പ്രസിഡന്റ് ഡോ.റാംമോഹന്, ബ്ലഡ് ഡോണേഴ്സ് കേരള ചാരിറ്റബിള് സൊസൈറ്റി രക്ഷാധികാരി ഡോ.ഷാഹുല് ഹമീദ്, നൗഷാദ് ബേയ്ക്കല്, പത്മനാഭന് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: