പാലാ: നഗരസഭാ മാര്ക്കറ്റ് കോംപ്ലക്സ് ലേല നടപടികള് ഉടന് പൂര്ത്തിയാക്കാന് അടിയന്തിര കൗണ്സില് യോഗം ഉടന് വിളിച്ചു ചേര്ക്കണമെന്നാവശ്യപ്പെട്ട് ഭരണപക്ഷത്തെ മാണി ഗ്രൂപ്പ് അംഗങ്ങളായ 12 പേര് ചേര്ന്ന് ചെയര്പേഴ്സണ് ലീനാ സണ്ണിക്ക് നോട്ടീസ് നല്കി. ആകെയുളള കൗണ്സിലര്മാരില് മൂന്നില് ഒന്ന് പേര് ഒപ്പിട്ട് നോട്ടീസ് നല്കി ആവശ്യപ്പെട്ടാല് പ്രത്യേക കൗണ്സില് യോഗം വിളിക്കണമെന്നതാണ് ചട്ടം.
മാര്ക്കറ്റ് കോംപ്ലക്സ് ലേല നടപടികള് വൈകുന്നതില് ദുരൂഹതയുണ്ടെന്നാണ് ഭരണപക്ഷത്തെ തന്നെ കൗണ്സിലര്മാരുടെ ആരോപണം. മാര്ക്കറ്റ് കോംപ്ലക്സുമായി ബന്ധപ്പെട്ട എല്ലാ വിഷയങ്ങളും അടിയന്തിര കൗണ്സില് യോഗം വിളിച്ചു ചേര്ത്ത് ചര്ച്ച ചെയ്ത് തീരുമാനം ഉണ്ടാക്കണമെന്നും ഇവര് ആവശ്യപ്പെടുന്നു.
വൈസ് ചെയര്മാന് കുര്യാക്കോസ് പടവന്, ടോണി തോട്ടം, ബിജി ജോജോ കുടക്കച്ചിറ, ജോര്ജ്കുട്ടി ചെറുവള്ളില്, ജോബി വെള്ളാപ്പാണി, പ്രൊഫ. സെലിന് റോയി, ടോമി തറക്കുന്നേല്, കൊച്ചുറാണി അപ്രേം, പി.കെ മധു, മേരി ഡൊമിനിക്, ലിസി ജോസ്, സിബില് തോമസ് എന്നീ കൗണ്സിലര്മാരാണ് അടിയന്തിര കൗണ്സില് യോഗം വിളിച്ചു കൂട്ടണമെന്ന് ആവശ്യപ്പെട്ടിട്ടുള്ളത്. മാണി ഗ്രൂപ്പില് ആകെ 17 മുനിസിപ്പല് കൗണ്സിലര്മാരാണുള്ളത്. ഇതില് 4 പേര് ചെയര്പേഴ്സണ് ലീനാ സണ്ണിയുടെ പക്ഷത്ത് ഉറച്ചു നില്ക്കു ന്നവരാണ്. മൂന്നിലൊന്ന് കൗണ്സിലര്മാര് ഒരുമിച്ച് ആവശ്യപ്പെട്ട സ്ഥിതിക്ക് ഉടന് അടിയന്തിര കൗണ്സില് യോഗം വിളിച്ചു ചേര്ക്കുമെന്ന് ചെയര്പേഴ്സണ് ലീനാ സണ്ണി പുരയിടം പറഞ്ഞു.
പ്രതികരിക്കാൻ ഇവിടെ എഴുതുക: