ഇരിട്ടി: കുപ്രസിദ്ധ മോഷ്ടാവ് പനക്കല് ചന്ദ്രന് ഉള്പ്പെടെ നാലംഗ കവര്ച്ചാസംഘത്തെ ഉളിക്കല് പോലീസ് പിടികൂടി. കവര്ച്ചക്കായുള്ള യാത്രക്കിടെ ഇന്നലെ പുലര്ച്ചെ കൂട്ടുപുഴ പേരട്ടയില് വെച്ചാണ് ഉളിക്കല് പ്രിന്സിപ്പല് സിഐ ശിവന് ചോടോത്തിന്റെ നേതൃത്വത്തിലുള്ള പോലീസ് സംഘം സംഘത്തെ പിടികൂടുന്നത്. ഇവര് സഞ്ചരിച്ച പിക്കപ്പ് വാനും പോലീസ് കസ്റ്റഡിയില് എടുത്തു.
കേരളത്തിലും കര്ണ്ണാടകത്തിലുമായി നിരവധി കവര്ച്ചാകേസിലും ക്രിമിനല് കേസുകളിലും പ്രതിയായ ചന്ദ്രന് എന്ന പനക്കല് ചന്ദ്രന് (58), നിലമ്പൂര് ഏലഞ്ചേരി ചെമ്പകശ്ശേരി ഹൗസില് ജിമ്മി (42), മുഴക്കുന്ന് അയ്യപ്പന്കാവില് അരയാക്കൂല് ഹൗസില് അബ്ദുള് നിസാര് എന്ന ഷെയ്ക്ക് നാസര് (47), പേരട്ട തൊട്ടില് പാലം സെയ്ദ് എന്ന അബ്ബാസ്(27) എന്നിവരെയാണ് ഉളിക്കല് പ്രിന്സിപ്പള് എസ്ഐ ശിവന് ചോടോത്ത്, സിവില് പോലീസ് ഓഫീസര്മാരായ ജയേഷ്, ഉമേശന്, അനില് എന്നിവര് ചേര്ന്ന് പിടികൂടിയത്.
വീരാജ്പേട്ടയിലെ ഒരു മോഷണക്കേസില് കര്ണ്ണാട പോലീസ് പിടികൂടി മൈസൂര് ജയിലില് റിമാന്റിലായിരുന്ന ചന്ദ്രന് ഒരാഴ്ച്ച മുമ്പാണ് റിമാന്റുകാലാവധി കഴിഞ്ഞ് പുറത്തിറങ്ങിയത്. നിരവധി കേസുകളില് ശിക്ഷിക്കപ്പെട്ടിട്ടുണ്ട്. നിരവധി കേസുകളില് വിവിധ കോടതികളില് ചന്ദ്രന് വാറണ്ടുമുണ്ട്. ഇയാളുടെ നേതൃത്വത്തില് മറ്റു കവര്ച്ചാ സംഘത്തിനൊപ്പം മോഷണം നടത്താനുള്ള ഒരുക്കവുമായുള്ള യാത്രയിലാണ് കൂട്ടുപുഴ പേരട്ടയില്വെച്ച് ഇവര് പിടിയിലാകുന്നത്
ജിമ്മി നിലമ്പൂര്, മലപ്പുറം തുടങ്ങിയ പോലീസ് സ്റ്റേഷനുകളിലും മോഷണക്കേസില് പ്രതിയാണ്. മറ്റു കൂട്ടാളികളും വിവിധ പ്രദേശങ്ങളിലെ മോഷണക്കേസുകളില് പ്രതികളാണ്. ഇവരെ ഉളിക്കല് പോലീസ് ചോദ്യം ചെയ്തു വരികയാണ്. ഇന്ന് കവര്ച്ചാ സംഘത്തേയും ഇവര് സഞ്ചരിച്ച വാഹനവും കോടതിയില് ഹാജരാക്കുമെന്ന് ഉളിക്കല് എസ്ഐ ശിവന് ചോടോത്ത് അറിയിച്ചു.
പ്രതികരിക്കാൻ ഇവിടെ എഴുതുക: