ഹോം » വാര്‍ത്ത » കേരളം » 

പദ്മനാഭസ്വാമി ക്ഷേത്രത്തില്‍ കുറ്റമറ്റ സുരക്ഷ – വി.എസ് ശിവകുമാര്‍

July 12, 2011

തിരുവനന്തപുരം: ശ്രീപദ്മനാഭ സ്വാമിക്ഷേത്രത്തില്‍ കുറ്റമറ്റ സുരക്ഷാ ക്രമീകരണങ്ങള്‍ ഏര്‍പ്പെടുത്തിയെന്ന് ദേവസ്വം മന്ത്രി വി.എസ്. ശിവകുമാര്‍ നിയമസഭയെ അറിയിച്ചു‍. കേരള പോലീസ്, പോലീസ് കമാന്‍ഡോ, ദ്രുതകര്‍മ സേന എന്നിവരുടെ നേതൃത്വത്തിലാണ് സുരക്ഷയെന്നും അദ്ദേഹം അറിയിച്ചു.

പാലോട് രവിയുടെ അടിയന്തര ചോദ്യത്തിനു മറുപടി പറയുകയായിരുന്നു ദേവസ്വം മന്ത്രി. ക്ഷേത്രത്തിന്റെ സുരക്ഷയ്ക്ക് എത്ര തുകവേണമെങ്കിലും ചെലവാക്കാമെന്ന നിലപാടാണ് സര്‍ക്കാരിനുള്ളത്. ക്ഷേത്രസുരക്ഷ ഫലപ്രദമാക്കാന്‍ ക്ഷേത്രാചാരങ്ങള്‍ക്കു തടസം വരുത്താതെ മൂന്നു ഓഫിസര്‍മാരും മൂന്നു ഹവീല്‍ദാര്‍മാരും 47 പോലീസ് കോണ്‍സ്റ്റബിള്‍മാരും ഉള്‍പ്പെടെ 53 പേരെ മൂന്നു ഷിഫ്റ്റുകളിലായി ക്ഷേത്രത്തിനകത്തും ഒരു ഓഫീസറും മൂന്നു ഹവീല്‍ദാര്‍മാരും 69 കോണ്‍സ്റ്റബിള്‍മാരും ഉള്‍പ്പെടെ 73 പേരെ ക്ഷേത്രത്തിനു പുറത്തുമായി സുരക്ഷയ്ക്കു വിന്യസിച്ചിട്ടുണ്ട്.

എ.ഡി.ജി.പി വേണു ഗോപാല്‍ കെ. നായരുടെ നേതൃത്വത്തില്‍ ഇന്റലിജന്‍സ് എ.ഡി.ജി.പി എ. ഹേമചന്ദ്രന്‍, ഇന്റേണല്‍ സെക്യൂരിറ്റി ഐ.ജി എസ്. അനന്തകൃഷ്ണന്‍, റെയ്ഞ്ച് ഐ.ജി കെ. പ്ദമകുമാര്‍ എന്നിവരടങ്ങിയ പ്രത്യേക സുരക്ഷാസമിതിയും രൂപീകരിച്ചു.

സുപ്രീംകോടതി നിയോഗിച്ച കമ്മിറ്റിയുടെ നേതൃത്വത്തിലാണ് ക്ഷേത്രത്തിലെ നിലവറകള്‍ തുറന്നു സ്വത്തുക്കള്‍ കണ്ടെത്തി തിട്ടപ്പെടുത്തി വരുന്നത്. ആ പ്രക്രിയ തുടരുന്നുവെന്നും വി.എസ് ശിവകുമാര്‍ പറഞ്ഞു. എന്നാല്‍ ക്ഷേത്രത്തില്‍ ഇപ്പോള്‍ ഏര്‍പ്പെടുത്തിയിരിക്കുന്ന സുരക്ഷ അപര്യാപ്തമാണെന്ന് പ്രതിപക്ഷ ഉപനേതാവ് കോടിയേരി ബാലകൃഷ്ണന്‍ ആരോപിച്ചു.

ക്ഷേത്രത്തിലെ സുരക്ഷ ഏര്‍പ്പെടുത്തിയെന്ന് അവകാശപ്പെടുമ്പോഴും ക്ഷേത്രത്തിനുള്ളില്‍ സ്ത്രീകളുടെ മാല പൊട്ടിച്ച നിരവധി സംഭവങ്ങള്‍ ഉണ്ടായെന്നു പത്രവാര്‍ത്തകളിലൂടെ വ്യക്തമാകുന്നതെന്നു കോടിയേരി പറഞ്ഞു. മുഖ്യമന്ത്രിയുമായി കൂടിയാലോചിച്ച് ഇത്തരം സംഭവങ്ങള്‍ ആവര്‍ത്തിക്കാതിരിക്കാനുള്ള നടപടികള്‍ സ്വീകരിക്കണം.

ഇപ്പോള്‍ ഒരേ സമയം 15 പോലീസുകാര്‍ മാത്രമാണ് ഡ്യൂട്ടിയിലുള്ളതെന്നും സുരക്ഷ വര്‍ദ്ധിപ്പിക്കണമെന്നും അദ്ദേഹം ആവശ്യപ്പെട്ടു.

അഭിപ്രായം രേഖപ്പെടുത്താംമലയാളത്തില്‍ ടൈപ്പ് ചെയ്യാന്‍

കേരളം - പുതിയ വാര്‍ത്തകള്‍
Related News from Archive
Editor's Pick