പോത്തന്കോട് : പരാതി അന്വേഷിക്കാന് എത്തിയ പഞ്ചായത്ത് ജീവനക്കാരെ സമരക്കാര് കെട്ടിടത്തിനുള്ളില് പൂട്ടിയിട്ടു. മുരുക്കുപുഴയിലെ മദ്യ വില്പനശാല പ്രവര്ത്തിക്കുന്ന കെട്ടിടം ചട്ടവിരുദ്ധമായി പ്രവര്ത്തിക്കുന്നു എന്ന് കാട്ടി ജനകീയ സമരക്കാര് നല്കിയ പരാതി അന്വേഷിക്കാന് എത്തിയതായിരുന്നു ഇവര്. വ്യാഴാഴ്ച ഉച്ചയ്ക്കാണ് സംഭവങ്ങള് അരങ്ങേറിയത്. മദ്യ വില്പനശാല പ്രവര്ത്തിക്കുന്ന കെട്ടിടം ചട്ടവിരുദ്ധമായാണ് പ്രവര്ത്തിക്കുന്നതെന്ന് കാട്ടി സമരക്കാര് പഞ്ചായത്തില് പരാതി നല്കിയിരുന്നു. തുടര്ന്നു മംഗലപുരം ഗ്രാമപഞ്ചായത്തില് നിന്നും കെട്ടിടം പരിശോധിക്കാന് ക്ലാര്ക്ക് ജോഷിയും ,ഓഫിസ് അസിസ്റ്റന്റ് മോഹനന് നായരും എത്തി. കെട്ടിടത്തിനുള്ളില് കയറിയപ്പോള് സമരക്കാര് പുറത്ത് നിന്നും വാതില് പൂട്ടുകയായിരുന്നു. ഇതറിഞ്ഞ് ചര്ച്ചയ്ക്കെത്തിയ പഞ്ചായത്ത് ഓവര്സീയര്മാരെയും കെട്ടിടത്തിനുള്ളില് പൂട്ടിയിട്ടു. തുടര്ന്നു ജീവനക്കാര് പോലീസില് അറിയിച്ചതിനെ തുടര്ന്നു മംഗലപുരം പോലിസ് എത്തി ജീവനക്കാരെ മോചിപ്പിക്കുകയായിരുന്നു. ജീവനക്കാരെ തടഞ്ഞ് ജോലി തടസപ്പെടുത്തി എന്ന കുറ്റങ്ങള് ചുമത്തി സമരക്കാര്ക്ക് എതിരെ കേസെടുത്തു.
പ്രതികരിക്കാൻ ഇവിടെ എഴുതുക: