മരട്: വളന്തകാട് നിവാസികളുടെ യാത്രാക്ലേശമടക്കമുളള പ്രശ്നങ്ങള്ക്ക് അടിയന്തരമായി പരിഹാരം കാണണമെന്ന് ആവശ്യപ്പെടുന്ന വളന്തകാട് പഠന റിപ്പോര്ട്ട് ബിജെപി മരട് മുനിസിപ്പല് സമിതി കളക്ടര്ക്ക് സമര്പ്പിച്ചു. വളന്തകാട് നിവാസികളുടെ പ്രശ്നങ്ങളെക്കുറിച്ച് പഠിക്കാന് 2016 ഏപ്രില് മാസം ബാലഗോകുലം ജില്ലാ കാര്യദര്ശിയും പരിസ്ഥിതി പ്രവര്ത്തകനുമായ കെ.ജി. ശ്രീകുമാറിന്റെ നേതൃത്വത്തില് മുന്നംഗ വളന്തകാട് പഠനസമിതിയെ ബിജെപി മരട് ഏരിയ കമ്മിറ്റി ചുമതലപ്പെടുത്തി പഠനസമിതിയുടെ റിപ്പോര്ട്ട് 2016 മെയ് 10ന് പ്രധാനമന്ത്രിക്ക് സമര്പ്പിച്ചു.
വളന്തകാട് നിവാസിയായ ജഗതമ്പി കൃഷ്ണന് വളന്തകാട് നിവാസികളുടെ പ്രശ്നങ്ങള്ക്ക് പരിഹാരം കാണണമെന്ന് ആവശ്യപ്പെട്ട് പ്രധാനമന്ത്രിക്ക് നല്കിയ പരാതിയുടെ അടിസ്ഥാനത്തില് പ്രിന്സിപ്പല് സെക്രട്ടറി ജില്ലാ കളക്ടര്ക്ക് അയച്ച കത്തിന് അനുബന്ധമായിട്ടാണ് ഇന്നലെ വളന്തകാട് പഠനസമിതി, പ്രധാനമന്ത്രിക്കു കഴിഞ്ഞവര്ഷം സമര്പ്പിച്ച റിപ്പോര്ട്ടിന്റെ പകര്പ്പ് ജില്ലാ കളക്ടര്ക്ക് സമര്പ്പിച്ചത്. വളന്തകാട് നിവാസികളെ മരട് നഗരവുമായി ബന്ധിപ്പിക്കുവാനായി വളന്തകാട് പാലം നിര്മ്മിക്കണമെന്നും ബിജെപി മരട് മുനിസിപ്പല് കമ്മിറ്റി അദ്ധ്യക്ഷന് എം. നന്ദനന്, ജനറല് സെക്രട്ടറി എന്.കെ. ശ്രീവത്സന് എന്നിവര് പത്രക്കുറിപ്പിലൂടെ അറിയിച്ചു.
പ്രതികരിക്കാൻ ഇവിടെ എഴുതുക: