റിയാദ്: ഭീകരവാദത്തിനെതിരായ പോരാട്ടം നന്മയും തിന്മയും തമ്മിലുള്ള യുദ്ധമാണെന്ന് അമേരിക്കന് പ്രസിഡന്റ് ഡൊണാള്ഡ് ട്രംപ്. ഇതിനെ മതവുമായി ബന്ധിപ്പിക്കേണ്ടതില്ല. വിശ്വാസങ്ങള് തമ്മിലുള്ള യുദ്ധമല്ല ഇത്. ഭീകരതക്കെതിരായ പോരാട്ടം ഇസ്ലാം മതത്തിനെതിരായ യുദ്ധമല്ല, ട്രംപ് പറഞ്ഞു.
സൗദി അറേബ്യ സന്ദര്ശിക്കുന്ന ട്രംപ് മുസ്ലീം രാജ്യങ്ങളില് നിന്നുള്ള പ്രതിനിധികളെ അഭിസംബോധന ചെയ്യവെ, ഭീകരതക്കെതിരായ പോരാട്ടത്തിലൂന്നിയാണ് സംസാരിച്ചത്. ഭീകരര്ക്ക് ആളും അര്ഥവും നല്കുന്ന രാജ്യമാണ് ഇറാന് എന്ന് ട്രംപ് പറഞ്ഞു. ഇറാന് കടുത്ത താക്കീതു നല്കുന്ന രീതിയിലാണ് ട്രംപ് സംസാരിച്ചത്.
ഭീകരര്ക്കെതിരായ പോരാട്ടത്തില് മുസ്ലീം രാജ്യങ്ങളുടെ പിന്തുണ വേണമെന്ന് ട്രംപ് പറഞ്ഞു. ലോകത്തിലെ മഹത്തായ വിശ്വാസങ്ങളിലൊന്നാണ് ഇസ്ലാം. ഇസ്ലാമിക് സ്റ്റേറ്റ് പോലുള്ള ഭീകര പ്രസ്ഥാനങ്ങളില് നിന്ന് ഇസ്ലാമിനെ മാറ്റിക്കാണാന് കഴിയണം. നിങ്ങളുടെ രാജ്യത്തു നിന്ന് അവരെ ആട്ടിയോടിക്കുക, നിങ്ങളുടെ ആരാധനാലയങ്ങളില് നിന്ന് അവരെ ആട്ടിയോടിക്കുക, ഈ ഭൂമിയില് നിന്നു തന്നെ അവരെ ആട്ടിയോടിക്കുക, ട്രംപ് ആഹ്വാനം ചെയ്തു.
പ്രതികരിക്കാൻ ഇവിടെ എഴുതുക: