ന്യൂദല്ഹി: എന്ഡിഎ സര്ക്കാരിന്റെ മൂന്നാം വാര്ഷികാഘോഷങ്ങള് മെയ് 26 മുതല് ജൂണ് 15 വരെ രാജ്യവ്യാപകമായി നടത്തുമെന്ന് ബിജെപി. തെരഞ്ഞെടുത്ത 900 നഗരങ്ങളില് മോദി ഫെസ്റ്റ് (മേയ്ക്കിംഗ് ഓഫ് ഡവലപ്ഡ് ഇന്ത്യ ഫെസ്റ്റിവല്) എന്ന പേരിലാണ് ആഘോഷങ്ങളെന്ന് കേന്ദ്രമന്ത്രി സ്മൃതി ഇറാനി അറിയിച്ചു. 26ന് ഗുവാഹതിയില് ആഘോഷങ്ങളുടെ ഉദ്ഘാടനം പ്രധാനമന്ത്രി നരേന്ദ്രമോദി നിര്വഹിക്കും.
കഴിഞ്ഞ മൂന്നുവര്ഷം നരേന്ദ്രമോദി സര്ക്കാര് ആവിഷ്ക്കരിച്ച് നടപ്പാക്കിയ ജനക്ഷേമ പദ്ധതികളുടെ പ്രദര്ശനവും പുതിയ പദ്ധതികളുടെ പ്രഖ്യാപനവുമാണ് മോദിഫെസ്റ്റിലെ പ്രധാന ആകര്ഷണങ്ങള്. പദ്ധതിയുടെ ഗുണഭോക്താക്കളായ ആളുകളാണ് പരിപാടികളില് പ്രധാനമായും പങ്കെടുക്കുകയെന്നും സ്മൃതി ഇറാനി പറഞ്ഞു.
25 കോടി ജനങ്ങളെ ബാങ്കിംഗ് സംവിധാനവുമായി ബന്ധിപ്പിച്ച ജന് ധന് യോജനയും 7 കോടി പേര്ക്ക് ആശ്വാസമായ മുദ്രാ യോജനയും രണ്ടുകോടി സ്ത്രീകള്ക്ക് പുതിയ പാചകവാതക കണക്ഷനുകള് നല്കിയ പ്രധാനമന്ത്രി ഉജ്ജ്വല യോജനയും മോദി സര്ക്കാരിന്റെ വലിയ നേട്ടങ്ങളാണെന്ന് ഇറാനി പറഞ്ഞു.
മോദി ഫെസ്റ്റിന്റെ ഭാഗമായി ദേശീയ അധ്യക്ഷന് അമിത് ഷാ കേരളം, ഛത്തീസ്ഗഢ്, അരുണാചല് പ്രദേശ്, ആന്തമാന് എന്നിവിടങ്ങളിലെ പരിപാടികളില് പങ്കെടുക്കും. കേന്ദ്രമന്ത്രിമാരായ ജെ.പി നദ്ദ, രവിശങ്കര് പ്രസാദ്, പ്രകാശ് ജാവദേക്കര് എന്നിവരാണ് കേരളത്തിലെ വിവിധ നഗരങ്ങളിലെ പരിപാടികളില് പങ്കെടുക്കുന്നത്. മഹാരാഷ്ട്ര മുഖ്യമന്ത്രി ദേവേന്ദ്ര ഫട്നവിസ് കൊച്ചിയില് നടക്കുന്ന മോദി ഫെസ്റ്റില് പങ്കെടുക്കും.
പ്രതികരിക്കാൻ ഇവിടെ എഴുതുക: