തിരുവനന്തപുരം: കഴിഞ്ഞ യുഡിഎഫ് സര്ക്കാരിന്റെ കാലത്ത് ഒപ്പുവച്ച വിഴിഞ്ഞം കരാര് സംസ്ഥാന താത്പര്യത്തിന് വിരുദ്ധമാണെന്ന് കംപ്ട്രോളര് ആന്ഡ് ഓഡിറ്റര് ജനറലിന്റെ ( സിഎജി) റിപ്പോര്ട്ട്. കരാര് കാലാവധി 40 വര്ഷമാക്കിയത് സംസ്ഥാന താല്പര്യം ഹനിക്കുന്നതാണെന്നും നിയമവിരുദ്ധമാണെന്നും സിഎജി റിപ്പോര്ട്ട് പറയുന്നു.
40 വര്ഷത്തിന് ശേഷം വേണമെങ്കില് സംസ്ഥാനസര്ക്കാരിന് കരാര് കാലാവധി 20 വര്ഷംകൂടി നീട്ടിനല്കാമെന്ന വ്യവസ്ഥ സംസ്ഥാനത്തിന് ഗുണകരമാകില്ലെന്നും റിപ്പോര്ട്ട് പറയുന്നു. റിപ്പോര്ട്ട് നിയമസഭയുടെ മേശപ്പുറത്തുവെച്ചു.
കഴിഞ്ഞദിവസമാണ് വിഴിഞ്ഞം തുറമുഖ കരാറിനെതിരെ രൂക്ഷമായ വിമര്ശനവുമായി വിഎസ് അച്യുതാനന്ദന് രംഗത്ത വന്നിരുന്നു. അതിന് പിന്നാലെയാണ് സിഎജി റിപ്പോര്ട്ട് വന്നത്. അദാനിക്ക് 29000 കോടിയുടെ അധിക ലാഭമുണ്ടാക്കിക്കൊടുക്കാനെ കരാര് ഉപകരിക്കുവെന്നും റിപ്പോര്ട്ടില് കുറ്റപ്പെടുത്തുന്നു.
7525 കോടി മുടക്കി നിര്മിക്കുന്ന വിഴിഞ്ഞം തുറമുഖത്തിനായി 67 ശതമാനം തുകയും മുടക്കുന്നത് സംസ്ഥാന സര്ക്കാരാണ്. 33 ശതമാനം തുക മാത്രമാണ് അദാനി ഗ്രൂപ്പ് മുടക്കുന്നത്. എന്നാല് കരാര് കാലാവധി പൂര്ത്തിയാകുമ്പോള് അദാനിക്ക് വന് ലാഭമാണ് ഉണ്ടാകുക. സംസ്ഥാനത്തിന് ലാഭമുണ്ടാകുന്നില്ലെന്ന് മാത്രമല്ല അധിക ബാധ്യത ഉണ്ടാക്കുകയും ചെയ്യുന്നു.
സാധാരണ പിപിപിയായി നടത്തുന്ന പദ്ധതികളില് കരാര് കാലവധി 30 വര്ഷമാണ്. എന്നാല് വിഴിഞ്ഞം കരാറില് ഇത് 40 വര്ഷമാണ്. അതുകൊണ്ടുതന്നെ അദാനിക്ക് 29217 കോടിയുടെ അധിക വരുമാനമുണ്ടാകുമെന്നാണ് സിഎജി ചൂണ്ടിക്കാണിച്ചിരിക്കുന്നത്.
പ്രതികരിക്കാൻ ഇവിടെ എഴുതുക: