കോഴിക്കോട്: ജപ്പാന് കുടിവെള്ള പദ്ധതിയില് നിന്ന് ബാലുശ്ശേരി ഗ്രാമപഞ്ചായത്തിലെ മൂന്നു വാര്ഡുകളെ ഒഴിച്ചുനിര്ത്തിയതില് പ്രതിഷേധിച്ച് നാട്ടുകാര് കോഴിക്കോട്ടെ വാട്ടര് അതോറിട്ടി ഓഫീസ് ഉപരോധിച്ചു. ജപ്പാന് കുടിവെള്ള ഉപഭോക്തൃ സംരക്ഷണസമിതിയുടെ നേതൃത്വത്തിലായിരുന്നു സമരം. നടപടി ഇനിയും വൈകിയാല് പദ്ധതിക്ക് തടസ്സം നില്ക്കുന്ന ഉദ്യോഗസ്ഥന്റെ വീട്ടുപടിക്കലേക്ക് പ്രദേശവാസികളെ സംഘടിപ്പിച്ച് സമരം സംഘടിപ്പിക്കുമെന്ന് ഭാരവാഹികള് പറഞ്ഞു.
ബാലുശ്ശേരി ഗ്രാമപഞ്ചായത്തിലെ 2,16 വാര്ഡുകളെ ഭാഗികമായും 17-ാംവാര്ഡിനെ പൂര്ണമായുമാണ് ജപ്പാന് കുടിവെള്ള പദ്ധതിയില് നിന്ന് ഒഴിവാക്കിയിരിക്കുന്നത്. 150 പേരാണ് മൂന്നുവാര്ഡുകളില് നിന്നുമായി 250 രൂപാ മുതല് 500 രൂപ വരെ ജപ്പാന് കുടിവെള്ള പദ്ധതിക്കായി അടച്ചിരിക്കുന്നത്.
ഈ വിഷയത്തില് 2015ല് ജനങ്ങളുടെ ഭീമ ഹര്ജി പുരുഷന് കടലുണ്ടി എംഎല്എയ്ക്ക് നല്കിയിരുന്നു. അന്നത്തെ മുഖ്യമന്ത്രി ഉമ്മന്ചാണ്ടിയുടെ ജനസമ്പര്ക്ക പരിപാടിയിലും വിഷയം ഉന്നയിച്ചു. സംഭവം വാട്ടര് അതോറിട്ടിയിലെ എല്ലാ ഉദ്യോഗസ്ഥന്മാരുടെയും ശ്രദ്ധയില്പ്പെടുത്തി. എന്നാല്, യാതൊരു നടപടിയും ഉണ്ടായില്ല.
ജില്ലാ പഞ്ചായത്ത് പ്രസിഡന്റ് ബാബു പറശ്ശേരിയുടെ ശ്രദ്ധയില് വിഷയം കൊണ്ടുവരികയും മുഖ്യമന്ത്രിക്കും ജലവിഭവവകുപ്പ് മന്ത്രിക്കും ഇ മെയില് വഴി പരാതിയും അയച്ചു. മുഖ്യമന്ത്രിയുടെ നിര്ദ്ദേശ പ്രകാരം ജലവിഭവവകുപ്പ് മന്ത്രി കോഴിക്കോട് കലക്ടറേറ്റില് യോഗം ചേര്ന്നതില് യുദ്ധകാലാടിസ്ഥാനത്തില് കുടിവെള്ള പ്രശ്നം പരിഹരിക്കണമെന്ന് ഉദ്യോഗസ്ഥര്ക്ക് നിര്ദ്ദേശം നല്കി. എന്നാല്, അസിസ്റ്റന്റ് എക്സിക്യൂട്ടീവ് എഞ്ചിനീയര് ജനപ്രതിനിധികളുടെ വാക്കുകള് മുഖവിലയ്ക്കെടുക്കുന്നില്ലെന്നാണ് ആരോപണം. ഈ എഞ്ചിനീയറെ മാറ്റണമെന്നും പ്രദേശത്തെ കുടിവെള്ള ക്ഷാമം പരിഹരിക്കാന് നടപടിയെടുക്കണമെന്നും പ്രതിഷേധക്കാര് ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: