തിരുവനന്തപുരം: നഗരസഭവളപ്പില് ജനകീയ ആസൂത്രണ പദ്ധതി പ്രകാരം സ്ഥാപിച്ച റിപ്രോഗ്രാഫിക് സെന്റര് വെള്ളാനയാകുന്നു. നിരവധി ക്രമക്കേടുകള് നടന്നിട്ടും നടപടി സ്വീകരിക്കാതെ നഗരസഭ. ലക്ഷക്കണക്കിന് രൂപ വര്ഷാവര്ഷം നല്കുന്നുണ്ടെങ്കിലും ചിലവഴിക്കുന്ന തുകയുടെ കണക്കുകളെ സംബന്ധിച്ച് യാതൊരു വ്യക്തതയുമില്ല. ഇത് പരിശോധിക്കേണ്ട നഗരസഭ ലോക്കല് ഫണ്ട് ഓഡിറ്റ് വിഭാഗമാകട്ടെ സ്ഥാപനത്തില് നിയമവരുദ്ധ പ്രവര്ത്തനങ്ങള് നടക്കുന്നതിനാല് പരിശോധന നടത്താറില്ല. തൊഴില് പരിശീലനങ്ങള്, കമ്പ്യൂട്ടര് പരിശീലനം, നഗരസഭയുടെ ഡിടിപി ജോലികള് തുടങ്ങിയവയാണ് സ്ഥാപനത്തില് നടന്നുവരുന്നത്. സ്ഥാപനത്തിനു കീഴില് ഒരു പ്രിന്റിംഗ് പ്രസ്സും പ്രവര്ത്തിക്കുന്നു.
സ്ഥാപനം ഇപ്പോള് പ്രവര്ത്തിപ്പിക്കുന്നത് ചിലരുടെ സ്വകാര്യ സ്വത്തുപോലെ. സര്ക്കാര് സര്വ്വീസിലുള്ള യുഡി ക്ലാര്ക്ക് തസ്തികയിലുള്ള ഉദ്യോഗസ്ഥനെ പ്ലാന് കോ-ഓര്ഡിനേറ്ററായി നിയമിക്കണമെന്നാണ് നിയമം. എന്നാല് സര്വ്വീസില് നിന്നും വിരമിച്ച ജിവനക്കാരനെയാണ് വര്ഷങ്ങളായി കോ-ഓര്ഡിനേറ്ററായി നിയമിച്ചിരിക്കുന്നത്. മുന് കാല ക്രമക്കേടുകള് കണ്ടു പിടിക്കാതിരിക്കാനാണ് ഇത്തരത്തിലുള്ള നിയമനം.
സിപിഎം പാര്ട്ടി നേതാക്കളെയാണ് കൗണ്സിലിന്റെ അനുമതി പോലും ഇല്ലാതെ ജീവനക്കാരായി നിയമിക്കുന്നത്. സ്ഥാപനത്തിന്റെ മുന് നടത്തിപ്പുകാരനായിരുന്ന ഒരു മുന് സിപിഎം നേതാവ് മുപ്പത് ലക്ഷത്തോളം രൂപ തട്ടിയെടുത്തു. ജീവനക്കാരനെ പുറത്താക്കിയതല്ലാതെ പണം തിരികെ പിടിക്കുന്നതിനുള്ള യാതൊരു നടപടിയും മേയറും സംഘവും സ്വീകരിച്ചില്ല. ഇത്തരത്തിലുള്ള ക്രമക്കേടുകള് രൂക്ഷമായപ്പോള് സ്ഥാപനവുമായി ബന്ധപ്പെട്ട ഫയലുകളില് സെക്രട്ടറി ഒപ്പിടാതായി. മേയര് ഉത്തരവിട്ടാണ് നിലവില് ഫയല് നടപടിക്രമങ്ങള് നടത്തിവരുന്നത്.
സ്ഥാപനത്തിന്റെ നടത്തിപ്പിന് കാലാ കാലങ്ങളില് ഒരു നിര്വ്വഹണ സമിതിയെ നിയോഗിക്കണമെന്നുണ്ട്. കൗണ്സിലിന്റെ അംഗീകാരവും വാങ്ങിക്കണം.ഇതൊന്നും മേയറും കൂട്ടരും നടപ്പിലാക്കുന്നില്ല. കാരണം സമിതിയെ നിയോഗിച്ചാല് മുന്കാല തട്ടിപ്പുകള് പുറത്ത് വരികയും കൂട്ടു നിന്ന ഭരണസമിതി നിയമനടപടികള് നേരിടേണ്ടതായും വരും.
യാതൊര് കണക്കും ഇല്ലെങ്കിലും എല്ലാ മാസവും മിസ്സലേനിയേഴ്സ് എന്ന അക്കൗണ്ടിലൂടെ 25000 രൂപ വരെ എഴുതിയെടുക്കുന്നു. ഈ തുക എത്തേണ്ടിടത്ത് എത്തുന്നുവെന്നാണ് നഗരസഭയിലെ സംസാരം. പ്രിന്റിംഗ് പ്രസ്സ് പാര്ട്ടിപ്രവര്ത്തനങ്ങള്ക്ക് ഉപയോഗിക്കുന്നതായും ആക്ഷേപമുണ്ട്. പുറത്ത് നിന്നുള്ള ജോലികള് ഏറ്റെടുക്കാനുള്ള അനുമതി ഉള്ളതിനാല് സംഘടനകളുടെ പോസ്റ്റര് അച്ചടിക്കുന്ന ജോലിയാണ് നടക്കുന്നത്.
പ്രതികരിക്കാൻ ഇവിടെ എഴുതുക: