കോട്ടയം: കേന്ദ്രസര്ക്കാരിന്റെ ഭരണ ഉപദേശക സംവിധാനമായ നിതി ആയോഗ് നിര്ദ്ദേശങ്ങളിലെ തൊഴിലാളി വിരുദ്ധ പരമാമര്ശങ്ങള് തള്ളിക്കളയണമെന്ന് ബിഎംഎസ് സംസ്ഥാന സമിതിയംഗം എസ്.വാരിജാക്ഷന് ആവശ്യപ്പെട്ടു. നിതി ആയോഗിന്റെ തൊഴിലാളി വിരുദ്ധ നയങ്ങളില് പ്രതിഷേധിച്ച് ബിഎംഎസ് നടത്തിയ ജില്ലാതല ധര്ണ്ണ കോട്ടയത്ത് ഉദ്ഘാടനം ചെയ്യുകയായിരുന്നു അദ്ദേഹം.
തുല്യ ജോലിക്ക് തുല്യവേതനം നല്കണമെന്ന സുപ്രീംകോടതി നിര്ദ്ദേശം അട്ടിമറിക്കാനുള്ള ശ്രമമാണ് നിതി ആയോഗിന്റേത്. കാര്ഷിക വരുമാനത്തിന് ആദായനികുതി ഏര്പ്പെടുത്താനും ഭക്ഷ്യമേഖലയിലെ സബ്സിഡി എടുത്തുകളയുവാനുമുള്ള നീക്കം രാജ്യപുരോഗതിക്ക് തടസ്സമാകും. ത്രികക്ഷി സംവിധാനം നടപ്പില്വരുത്തി നിതി ആയോഗിന്റെ തെറ്റായ നിര്ദ്ദേശങ്ങള് പിന്വലിക്കാന് കേന്ദ്രസര്ക്കാര് തയ്യാറാകണമെന്നും അദ്ദേഹം ആവശ്യപ്പെട്ടു. ബിഎംഎസ് സംസ്ഥാന സമിതിയംഗം കെ.എന്.മോഹനന്, ജില്ലാ പ്രസിഡന്റ് വി.എസ്.പ്രസാദ്, ജില്ലാ ട്രഷറര് എസ്.എസ്.ശ്രീനിവാസപിള്ള, വൈസ് പ്രസിഡന്റ് സന്തോഷ് പോള് എന്നിവര് പ്രസംഗിച്ചു.
പ്രതികരിക്കാൻ ഇവിടെ എഴുതുക: