കണ്ണൂര്: കുഞ്ഞിമംഗലം ഗവ.ഹയര് സെക്കന്ററി സ്കൂള് അഡീഷണല് സ്കില് അക്വിസിഷന് പ്രോഗ്രാമിലെ വിദ്യാര്ത്ഥികള് തയ്യാറാക്കിയ ലഹരിവിരുദ്ധ പാവനാടകത്തിന്റെ ഉദ്ഘാടനവും വിമുക്തിയുടെ ആഭിമുഖ്യത്തിലുള്ള കല്ല്യാശ്ശേരി മണ്ഡലം ലഹരി വിരുദ്ധ സംഗമവും 27 ന് വൈകുന്നേരം 3 മണിക്ക് സ്കൂള് അങ്കണത്തില് നടക്കും. റവന്യു മന്ത്രി ഇ.ചന്ദ്രശേഖരന് ഉദ്ഘാടനം ചെയ്യും. ചടങ്ങില് വിദ്യാര്ത്ഥികളും രക്ഷിതാക്കളും ലഹരി വിരുദ്ധ പ്രതിജ്ഞയെടുക്കും.
പ്രശസ്ത കവയിത്രി സുഗതകുമാരിയുടെ അമ്മ എന്ന ലേഖനത്തെ ആധാരമാക്കി ഒരു വര്ഷത്തെ പരിശ്രമ ഫലമായാണ് പാവനാടകം തയ്യാറായത്. ചിത്രകലാ അധ്യാപകന് പ്രമോദ് അടുത്തിലയാണ് സംവിധാനം. കുഞ്ഞിമംഗലം സ്കൂളിലെ പ്ലസ് ടു അധ്യാപകന് ഡോ.ജിനേഷ് കുമാര് എരമമാണ് നാടക രചന. പാവനിര്മ്മാണം, ഡബ്ബിങ്, ആലാപനം, പാവകളെ ചലിപ്പിക്കല് എന്നിവയെല്ലാം കുട്ടികള് തന്നെയാണ് ചെയ്തിരിക്കുന്നത്. പാവനാടകം എന്ന കലാരൂപത്തെ ലഹരിവിരുദ്ധ സന്ദേശം പ്രചരിപ്പിക്കാന് ഉപയോഗിക്കുന്നതും ആദ്യമാണ്. നഗരത്തില് പഠിക്കുന്ന മകന് ഒരമ്മ എഴുതുന്ന കത്തിന്റെ രൂപത്തിലാണ് നാടകം. ലഹരിക്കടിപ്പെട്ട് ഭ്രാന്താശുപത്രിയിലാകുന്ന ഒരു വിദ്യാര്ത്ഥിയുടെ കഥ പറഞ്ഞ് ഭാവിയില് ഒരാളും ലഹരിയുടെ വലയില് വീഴരുതെന്ന് അമ്മ ഉപദേശിക്കുന്നു. ലഹരി വിരുദ്ധ ഗാനത്തോടെയാണ് പാവനാടകം അവസാനിക്കുന്നത്.
സ്കൂള് പ്രിന്സിപ്പാള് വി.സുരേന്ദ്രന്, എം.പി.തിലകന്, ഡോ.ജിനേഷ് കുമാര് എരമം, പ്രമോദ് അടുത്തില, അബ്ദുള് റഷീദ് എന്നിവര് വാര്ത്താ സമ്മേളനത്തില് പങ്കെടുത്തു.
പ്രതികരിക്കാൻ ഇവിടെ എഴുതുക: