വാഷിങ്ടണ്: മൂന്നു വര്ഷമായിട്ടും കേന്ദ്ര സര്ക്കാരിനെതിരെ ഒരു അഴിമതിയാരോപണം പോലും ഉന്നയിക്കാന് ആര്ക്കുമായിട്ടില്ലെന്ന് പ്രധാനമന്ത്രി നരേന്ദ്ര മോദി. അഴിമതിരഹിത, കളങ്കരഹിത സര്ക്കാരാണ് ഇപ്പോള് ഇന്ത്യ ഭരിക്കുന്നതെന്നും മോദി പറഞ്ഞു.
യുഎസ് സന്ദര്ശനത്തിനിടെ വിര്ജീനിയയില് ഇന്ത്യന് സമൂഹവുമായി സംസാരിക്കുകയായിരുന്നു പ്രധാനമന്ത്രി. വിദേശ മന്ത്രി സുഷമ സ്വരാജിനെ ആവോളം പുകഴ്ത്തിയ മോദി, പാക്കിസ്ഥാനെ പരോക്ഷമായി കുറ്റപ്പെടുത്തി. അറുന്നൂറോളം ഇന്ത്യന് വംശജരാണ് ചടങ്ങിനെത്തിയത്.
ഇന്ത്യക്കാര് അഴിമതിയെ വെറുക്കുന്നുവെന്ന് പറഞ്ഞ് തുടങ്ങിയ മോദി, അഴിമതിയില് പൂണ്ട് സര്ക്കാരുകള് പുറത്തായ കാര്യവും ചൂണ്ടിക്കാട്ടി. സാങ്കേതിക സംവിധാനങ്ങള് അഴിമതി തടയാന് പ്രയോജനപ്പെടുത്തി. സബ്സിഡികളടക്കം നേരിട്ട് അക്കൗണ്ടിലേക്ക് നല്കുന്ന സംവിധാനം നടപ്പാക്കിയത് ഇതു കൂടി ലക്ഷ്യമിട്ട്. വികസിതമായ, ആരോഗ്യമുള്ള ഇന്ത്യയാണ് ലക്ഷ്യം. ആരോഗ്യമുള്ളത് എന്നു പറയുമ്പോള് പ്രത്യേകിച്ച് സ്ത്രീകളുടെയും കുട്ടികളുടെയും ആരോഗ്യം, മോദി പറഞ്ഞു.
നയതന്ത്രത്തിന് മാനുഷിക മുഖം നല്കിയ വ്യക്തിയെന്നു പറഞ്ഞാണ് പ്രധാനമന്ത്രി സുഷമ സ്വരാജിനെ പുകഴ്ത്തിയത്. ഭരണം മികച്ചതാക്കാന് അവര് സാമൂഹ്യമാധ്യമങ്ങള് ഉപയോഗിക്കുന്നു. താനും സമൂഹമാധ്യമങ്ങള് ഉപയോഗിക്കുന്നുവെങ്കിലും ഒരു വകുപ്പ് എങ്ങനെ ശക്തിപ്പെടുത്താമെന്ന് കാണിച്ചത് സുഷമയും അവരുടെ മന്ത്രാലയവുമാണ്. ലോകത്തിന്റെ ഏതു കോണില് ഇന്ത്യക്കാര് പ്രശ്നത്തില്പ്പെട്ടാലും അവര് ഇടപെടും.
വിവിധ രാജ്യങ്ങളില് ദുരിതത്തിലായ 80,000 പേരെ നാട്ടിലെത്തിച്ചു. വിവാഹിതയായി പാക്കിസ്ഥാനിലേക്കു പോയ ഉസ്മ അഹമ്മദിനും നാട്ടിലെത്താനായത് സുഷമയുടെ ഇടപെടലിലൂടെയാണ്, മോദി പറഞ്ഞു.
പാക്കിസ്ഥാനിലെ ഭീകര ക്യാമ്പുകള്ക്കു നേരെ നടത്തിയ മിന്നലാക്രമണത്തെയും പ്രധാനമന്ത്രി ന്യായീകരിച്ചു. ഒരു രാജ്യമൊഴികെ മറ്റാരും ഇന്ത്യന് നടപടി എതിര്ത്തില്ലെന്ന് പാക്കിസ്ഥാനെ പേരെടുത്ത് പരാമര്ശിക്കാതെ മോദി പറഞ്ഞു. 20 വര്ഷം മുന്പ് ഭീകരതയെക്കുറിച്ച് നമ്മള് പറഞ്ഞപ്പോള് മറ്റുള്ളവര് ചിന്തിച്ചത് ഇവിടത്തെ ക്രമസമാധാന പ്രശ്നമെന്നു മാത്രമാണ്. അവര് അത് അനുഭവിച്ചിരുന്നില്ല. എന്നാല്, ഇന്ന് ആരെയും ഇതേക്കുറിച്ച് പഠിപ്പിക്കേണ്ടതില്ല, മോദി കൂട്ടിച്ചേര്ത്തു.
പോര്ച്ചുഗല് സന്ദര്ശനത്തിനു ശേഷം ഞായറാഴ്ച വാഷിങ്ടണ് ഡിസിയിലെ ആന്ഡ്രൂസ് വ്യോമത്താവളത്തിലെത്തിയ പ്രധാനമന്ത്രിക്ക് ഇന്ത്യന് വംശജരും യുഎസ്-ഇന്ത്യന് നയതന്ത്ര ഉദ്യോഗസ്ഥരും ഗംഭീര സ്വീകരണം നല്കി.
പ്രതികരിക്കാൻ ഇവിടെ എഴുതുക: