കോഴിക്കോട്: ശ്രീകൃഷ്ണ സന്ദേശം പകര്ന്നു അന്താരാഷ്ട്ര കൃഷ്ണാവബോധ സമിതി – ഇസ്കോണ്, നടത്തുന്ന പദയാത്ര കോഴിക്കോട്ട്. 2011 ഏപ്രിലില് ദ്വാരകയില് നിന്നാരംഭിച്ച പദയാത്രയാണ് നഗരത്തില് രണ്ടാം ദിവസം പ്രയാണം പൂര്ത്തിയാക്കിയത്.
രാവിലെ വളയനാട് ദേവീക്ഷേത്ര പരിസരത്ത് നിന്നാരംഭിച്ച യാത്ര നഗരംചുറ്റി തളി മഹാക്ഷേത്ര പരിസരത്ത് സമാപിച്ചു. ഭാരതപര്യടനം നടത്തുന്ന ഇസ്കോണിന്റെ ആറാമത്തെ പദയാത്രയാണിത്. 1984ലായിരുന്നു ആദ്യ പദയാത്ര. ഇതിനു മുമ്പു നടന്ന എല്ലാപദയാത്രകളും കേരളത്തില് എത്തിയിരുന്നെങ്കിലും കോഴിക്കോട്ടെത്തിയിരുന്നില്ല. 1984 ലും 94 ലും നടത്തിയ പദയാത്രകള് മാത്രമാണ് കോഴിക്കോട്ടെത്തിയത്. ഒരു പദയാത്ര ഭാരത പര്യടനം പൂര്ത്തിയാക്കാന് എട്ടുവര്ഷമാണ് എടുക്കുന്നത്.
കൃഷ്ണാവതാര കഥയും ഭഗവദ് ഗീതയുമൊക്കെ ഉള്പ്പെടുന്ന മലയാളം, ഇംഗ്ലീഷ് പുസ്തകങ്ങള് യാത്രയുടെ ഭാഗമായി വില്പ്പന നടത്തുന്നുണ്ട്. 1000 രൂപയുടെ പുസ്തകങ്ങള് യാത്രയുടെ ഭാഗമായി 500 രൂപക്കാണ് വില്പ്പന നടത്തുന്നത്. രണ്ടു കാളകള് വലിക്കുന്ന വലിയ രഥമാണ് യാത്രയുടെ പ്രധാന ആകര്ഷണം. ശ്രീ ചൈതന്യ മഹാപ്രഭു (ശ്രീകൃഷ്ണന്)വിന്റെയും നിത്യാനന്ദ പ്രഭു(ബലരാമന്)വിന്റെയും ഇസ്കോണ് സ്ഥാപാകാചാര്യന് എ.സി. ഭക്തിവേദാന്ത സ്വാമി പ്രഭുപാദരുടെയും വിഗ്രഹങ്ങളാണ് ഈ രഥത്തിലുള്ളത്. ആചാര്യദാസിന്റെ നേതൃത്വത്തിലുള്ള 33 ബ്രഹ്മചാരികള് പദയാത്രയായി രഥത്തെ അനുഗമിക്കുന്നു. ഭാരതത്തിന്റെ വിവിധ ഭാഗങ്ങളില് നിന്നുള്ളവരും റഷ്യയില് നിന്നുള്ള രണ്ടുപേരും ഈ സംഘത്തിലുണ്ട്. ഒരു ദിവസം 10 മുതല് 12 കിലോമീറ്റര് വരെ സഞ്ചരിക്കും. ഈ യാത്രയ്ക്കിടയില് പുസ്തകവില്പ്പന നടത്തുകയും ചെയ്യും.
ഗുജറാത്തില് നിന്നുള്ള കാണ്ക്രജ് ഇനത്തില്പ്പെട്ട അഞ്ചു കാളകളാണ് രഥം വലിക്കുന്നതിനായി ഉള്ളത്. ഒരു സമയം രണ്ടു കാളകളാണ് രഥം വലിക്കുക. ഇവക്ക് ക്ഷീണം അനുഭവപ്പെടുമ്പോള് ഇവയെ മാറ്റി മറ്റു കാളകളെകൊണ്ട് രഥം വലിപ്പിക്കും. പാചകം ഉള്പ്പെടെയുള്ള സംവിധാനങ്ങള് ഏര്പ്പെടുത്തിയ മൂന്ന്ട്രോളികളും യാത്രയിലുണ്ട്.
പദയാത്ര അവസാനിപ്പിക്കുന്ന ക്ഷേത്ര സങ്കേതങ്ങളില് നഗരസങ്കീര്ത്തനം, സന്ധ്യാ ആരതി, ഹരിനാമസങ്കീര്ത്തനം, പ്രസാദ വിതരണം, ഭഗവദ് ഗീത ക്ലാസ്, പുസ്തകവിതരണം എന്നിവ നടത്തും. യാത്ര ആരംഭിക്കുംമുമ്പ് രാവിലെ നിര്മ്മാല്യ പൂജ, തുളസി ആരതി, നരസിംഹ ആരതി, ഗുരുപൂജ, പ്രസാദ വിതരണം എന്നിവയുണ്ടാകും. ഇന്ന് രാവിലെ തളി ക്ഷേത്രത്തില് നിന്ന് ആരംഭിക്കുന്ന യാത്ര നഗരപ്രദക്ഷിണം നടത്തി തളി ക്ഷേത്രത്തില് തന്നെ സമാപിക്കും.
പ്രതികരിക്കാൻ ഇവിടെ എഴുതുക: