എരുമേലി: നിര്മ്മാണ പ്രവര്ത്തനത്തിന് തടസ്സമായി വഴിയരികില് നിന്നിരുന്ന വൈദ്യുതി പോസ്റ്റ് മാറ്റി സ്ഥാപിക്കാന് ആവശ്യപ്പെട്ടതിനെത്തുടര്ന്ന് നിര്മ്മാണം നടക്കുന്ന പാലത്തിന്റെ കൈവരിയില് കെട്ടിനിര്ത്തി കെഎസ്ഇബി ജീവനക്കാര് പ്രശ്നം പരിഹരിച്ചു.
എരുമേലി കരിങ്കല്ലുംമൂഴിക്ക് സമീപം തോടിനു കുറുകെ നിര്മ്മിക്കുന്ന പാലത്തിന്റെ നിര്മ്മാണ പ്രവര്ത്തനങ്ങള്ക്ക് തടസമായി നില്ക്കുന്ന വൈദ്യുതി പോസ്റ്റ്മാറ്റാനാണ് പഞ്ചായത്ത് അധികൃതര് കെഎസ്ഇബി അധികൃതരോട് ആവശ്യപ്പെട്ടത്.
എന്നാല് കെ എസ്ഇബി. ജീവനക്കാരെത്തി തത്ക്കാലത്തേക്ക് നിര്മ്മാണം നടക്കുന്ന പാലത്തിന്റെ കൈവരിയില് കെട്ടി നിര്ത്തുകയായിരുന്നു.
റോഡരികില് നിന്നും തോടിന് അക്കരെയുള്ള നൂറോളം കുടുംബങ്ങള്ക്ക് വൈദ്യുതി എത്തിക്കുന്ന ലൈനാണ് ഇത്തരത്തില് ഉദാസീനമായ നിലയില് സ്ഥാപിച്ചിരിക്കുന്നത്. മരം കൊണ്ടുള്ള പോസ്റ്റിന് വര്ഷങ്ങളുടെ പഴക്കമുണ്ട്.
ഇതു പഴകിദ്രവിച്ച് ഏതു സമയവും നിലംപൊത്താറായ അവസ്ഥയിലും. വീടുകളിലേയ്ക്ക് വൈദ്യുതി എത്തിക്കുന്നതിന് വൈദ്യുതി ലൈന് വലിക്കേണ്ടതിനു പകരം സര്വീസ് വയര് ഉപയോഗിച്ചാണ് അക്കരയ്ക്ക് വൈദ്യുതി വിതരണം ചെയ്യുന്നതെന്നും ആക്ഷേപമുണ്ട്
ഗുരുതരമായ പ്രശ്നങ്ങള് സൃഷ്ടിച്ചേക്കാവുന്ന രീതിയില് വൈദ്യുതി തൂണ് സ്ഥാപിച്ചിരിക്കുന്നത് എരുമേലി കെഎസ്ഇബി സെക്ഷന് ഓഫീസിനു തൊട്ടുസമീപത്തായി തന്നെയാണ്. വൈദ്യുതി പോസ്റ്റ് മാറ്റി പുതിയവ സ്ഥാപിച്ച് അപകടാവസ്ഥ പരിഹരിക്കണമെന്നാണ് നാട്ടുകാരുടെ ആവശ്യം.
പ്രതികരിക്കാൻ ഇവിടെ എഴുതുക: