കൊല്ലം: പിതൃമോക്ഷപുണ്യം തേടി ജില്ലയിലെ സ്നാനഘട്ടങ്ങളില് പതിനായിരങ്ങളെത്തി. കൊല്ലം തിരുമുല്ലവാരം വിഷ്ണുസങ്കേതത്തിലെ സമുദ്രതീരത്ത് ഇന്നലെ ബലിതര്പ്പണത്തിനായി ആയിരങ്ങളെത്തി. വിശ്വഹിന്ദുപരിഷത്ത് കൊല്ലം സേവാവിഭാഗത്തിന്റെ ആഭിമുഖ്യത്തില് ഒരേസമയം 500 പേര്ക്കു ബലിതര്പ്പണത്തിന് സജ്ജീകരണമൊരുക്കിയിരുന്നു. എറണാകുളം പാവക്കുളം ക്ഷേത്രത്തില്നിന്നും തന്ത്രിമുഖ്യന്മാരുടെ നേതൃത്വത്തില് ആചാര്യന്മാരും തിലഹവനം നടത്തുന്നതിനുള്ള പ്രത്യേകസൗകര്യവും ഉണ്ടായിരുന്നു.
മുണ്ടയ്ക്കല് പാപനാശനം കടപ്പുറത്തു കര്ക്കിടകവാവിനോട് അനുബന്ധിച്ചുള്ള പിതൃതര്പണകര്മങ്ങള് പാപനാശനം ഗുരുദേവ മന്ദിരം കമ്മിറ്റിയുടെ ആഭിമുഖ്യത്തില് നടന്നു. തന്ത്രി തടത്തില്മഠം ടി.കെ.ചന്ദ്രശേഖരസ്വാമിയുടെ മുഖ്യകാര്മികത്വത്തില് പതിനഞ്ചില്പരം പ്രമുഖ ക്ഷേത്രങ്ങളില്നിന്നും എത്തുന്ന തന്ത്രിമാരുടെ കാര്മികത്വത്തിലായിരുന്നു കര്മങ്ങള്. അഷ്ടമുടി വീരഭദ്രസ്വാമി ക്ഷേത്രത്തിലെ സ്നാനഘട്ടത്തില് ആയിരങ്ങള് ബലിതര്പ്പണം നടത്തി. ഞായറാഴ്ച പുലര്ച്ചെ ആരംഭിച്ച ബലിതര്പ്പണ ചടങ്ങുകള് വൈകിട്ട് 3.30ഓടെ സമാപിച്ചു. രണ്ടുവരിയായി ഒരേസമയം 500 പേര്ക്ക് വീതം ബലിയിടാന് ഇവിടെ സൗകര്യം ഒരുക്കിയിരുന്നു. ജ്യോതിഷപണ്ഡിതനും താന്ത്രികനുമായ വന്മള പി.വി. വിശ്വനാഥന്ശാന്തിയുടെ മുഖ്യകാര്മ്മികത്വത്തിലാണ് ബലിതര്പ്പണചടങ്ങുകള് നടന്നത്. ബലിയിടാന് എത്തിയവര്ക്ക് അഷ്ടമുടി ക്ഷേത്രത്തില് തിലഹോമം ഉള്പ്പടെയുള്ള പൂജകള് ദേവസ്വം മേല്ശാന്തി എന്.സുകുമാരന്റെയും നിത്യശാന്തി രാംകുമാറിന്റെയും നേതൃത്വത്തിലാണ് നടന്നത്. തെളിഞ്ഞ കാലാവസ്ഥയില് നടന്ന ചടങ്ങില് സ്ത്രീകള്ക്ക് ബലിതര്പ്പണം നടത്താന് പ്രത്യേക സൗകര്യം സജ്ജമാക്കിയിരുന്നു.
പുത്തൂര് പാങ്ങോട് താഴം തിരുആദിശമംഗലം മഹാവിഷ്ണുക്ഷേത്രത്തില് ശ്രീശൈലം നാരായണന് നമ്പൂതിരിയുടെ കാര്മികത്വത്തില് പിതൃതര്പണവും ക്ഷേത്രം തന്ത്രി വാസുദേവര് ഭട്ടതിരിയുടെ കാര്മികത്വത്തില് തിലഹവനവും നടന്നു. പരവൂര് കോങ്ങാല് പനമൂട് കുടുംബമഹാദേവര് ക്ഷേത്രത്തിലെ കര്ക്കടകവാവുബലിയില് നൂറുകണക്കിന് പേര് പങ്കെടുത്തു. ഇവിടെ സേവാഭാരതി ചുക്കുകാപ്പിവിതരണം നടത്തി. പട്ടാഴി കേരളമംഗലം മഹാവിഷ്ണു ക്ഷേത്രം, മെതുകുമ്പേല് ശ്രീനാരായണപുരം മഹാവിഷ്ണു ക്ഷേത്രം, ഇടമനക്കാവ് നാഗരാജാക്ഷേത്രം, എലിക്കാട്ടൂര് ദേവിക്ഷേത്രം, പുന്നല നീലകണ്ഠപുരം ശിവക്ഷേത്രം, കുണ്ടയം മഹാദേവര് ക്ഷേത്രം, പനങ്ങാട് ശ്രീ മഹാവിഷ്ണു ക്ഷേത്രം, വെളിനല്ലൂര് ശ്രീരാമസ്വാമി ക്ഷേത്രം, കുളത്തുപ്പുഴ അയ്യപ്പക്ഷേത്രം, പടിഞ്ഞാറേകല്ലട തിരുവാറ്റ ശ്രീമഹാദേവ ക്ഷേത്രം, ശൂരനാട് വടക്ക് കരിങ്ങാട്ടില് ശ്രീശിവപാര്വതി ക്ഷേത്രം, പുത്തൂര് ആദിശമംഗലം ക്ഷേത്രം, ഏറത്തു കുളക്കട വൈകുണ്ഠപുരം ക്ഷേത്രം, പുനലൂര് തൂക്കുപാലത്തിനു സമീപമുള്ള സ്നാനഘട്ടം, പുതിയിടത്ത് ശ്രീകൃഷ്ണസ്വാമി ക്ഷേത്രം, മുഹൂര്ത്തികാവ് ക്ഷേത്രം, ശിവന്കോവില് ക്ഷേത്രം, ചടയമംഗലം ശ്രീ മഹാദേവക്ഷേത്രം എന്നിവിടങ്ങളിലും മറ്റ് പ്രധാന ബലിതര്പ്പണ കേന്ദ്രങ്ങളിലും വന്തിരക്കാണ് അനുഭവപ്പെട്ടത്.
പ്രതികരിക്കാൻ ഇവിടെ എഴുതുക: