കണ്ണൂര്: ജില്ലാപഞ്ചായത്തിന്റെ ജലം സുലഭം പദ്ധതിയുടെ ഭാഗമായി സംഘടിപ്പിക്കുന്ന മൂല്യമറിയുക, ജലം കാത്തുവെക്കുക ക്യാമ്പയിനിന്റെ ലോഗോ പ്രകാശനം ചെയ്തു. ജില്ലാ പഞ്ചായത്ത് മിനി കോണ്ഫറന്സ് ഹാളില് നടന്ന ചടങ്ങില് ജില്ലാ കലക്ടര് മീര് മുഹമ്മദലി പ്രസ്ക്ലബ് പ്രസിഡന്റ് കെ.ടി ശശിക്ക് നല്കിയാണ് ലോഗോ പ്രകാശനം ചെയ്തത്. മഴവെള്ളം നാളേക്കുള്ള കരുതലാക്കി മാറ്റുക എന്ന സന്ദേശം ഓര്മിപ്പിക്കുന്ന ലോഗോ പാപ്പിനിശ്ശേരി സ്വദേശി രാജേഷ് പൂഞ്ഞത്താണ് തയ്യാറാക്കിയത്.
ജലസംരക്ഷണ പ്രവര്ത്തനങ്ങളുടെ ഭാഗമായി ആഗസ്റ്റ് 5 മുതല് 10 വരെ ജില്ലയിലെ പഞ്ചായത്തുകളില് ജലപാര്ലമെന്റ് സംഘടിപ്പിക്കുമെന്ന് ലോഗോ പ്രകാശനത്തിന് ശേഷം ജില്ലാ പഞ്ചായത്ത് പ്രസിഡന്റ് കെ.വി.സുമേഷ് അറിയിച്ചു. ജലസംരക്ഷണ പ്രവര്ത്തനങ്ങള് സജീവവും ജനകീയവുമാക്കുന്നതിനായി ആഗസ്റ്റ് 2 ന് രാവിലെ 10.30 ന് കുടുംബശ്രീ പ്രവര്ത്തകരുടെ യോഗവും 11 ബ്ലോക്കുകളിലും ബ്ലോക്ക്തല യോഗങ്ങളും വിളിച്ചു ചേര്ക്കും. ആഗസ്റ്റ് 8 ന് ജില്ലയിലെ പ്രൈമറി, ഹൈസ്കൂള്, ഹയര്സെക്കന്ററി ഉള്പ്പെടെ മുഴുവന് വിദ്യാഭ്യാസ സ്ഥാപനങ്ങളിലും ജലപാര്ലമെന്റ് നടത്താനും തീരുമാനിച്ചിട്ടുണ്ട്. കോളേജ്, ഹയര്സെക്കന്ററി എന്എസ്എസ് യൂണിറ്റുകള് ജില്ലയിലെ 27 പഞ്ചായത്തുകളിലായി ജലസംരക്ഷണ പ്രവര്ത്തനങ്ങളില് പങ്കാളികളാകുമെന്നും ജില്ലാ പഞ്ചായത്ത് പ്രസിഡന്റ് അറിയിച്ചു.
ചടങ്ങില് ജില്ലാ പഞ്ചായത്ത് വൈസ് പ്രസിഡണ്ട് പി.പി.ദിവ്യ, സ്റ്റാന്റിംഗ് കമ്മറ്റി ചെയര്മാന്മാരായ കെ.പി.ജയബാലന് മാസ്റ്റര്, കെ.കെ.ശോഭ, ജില്ലാപഞ്ചായത്ത് അംഗങ്ങളായ സണ്ണി മേച്ചേരി, അജിത് മാട്ടൂല്, ബ്ലോക്ക് പഞ്ചായത്ത് ബിഡഒമാര്, കൃഷിവകുപ്പ് ഉദ്യോഗസ്ഥര് എന്നിവരും പങ്കെടുത്തു.
പ്രതികരിക്കാൻ ഇവിടെ എഴുതുക: