ഹൈദരാബാദ്: മയക്കുമരുന്ന് കേസില് അന്വേഷണം നടത്തുന്ന പ്രത്യേക അന്വേഷണ സംഘം (എസ്ഐടി) തെലുങ്ക് സൂപ്പര് താരം രവി തേജയെ ചോദ്യം ചെയ്തു. ഇന്ന് രാവിലെയാണ് രവി തേജ ചോദ്യം ചെയ്യലിന് എസ്ഐടിയുടെ മുന്നില് ഹാജരായത്. ചോദ്യം ചെയ്യലിന് ഹാജരാകാന് താരത്തിന് നേരത്തെ നോട്ടീസ് നല്കിയിരുന്നു. രവി തേജയുടെ ചോദ്യം ചെയ്യലിനോട് അനുബന്ധിച്ച് എസ്ഐടിയുടെ ഓഫീസ് പരിസരത്ത് കനത്ത സുരക്ഷയാണ് ഒരുക്കിയിരിക്കുന്നത്.
മയക്കുമരുന്ന് കേസിലെ പ്രധാന പ്രതികളുമായി താരത്തിനുള്ള ബന്ധത്തെക്കുറിച്ചാവും എസ്ഐടി ചോദിക്കുക. ചോദ്യം ചെയ്യലിന് ഹാജരാകാന് എത്തിയ രവി തേജ മയക്കുമരുന്ന് മാഫിയയുമായി തനിക്ക് ഒരു ബന്ധവുമില്ലെന്നും എസ്ഐടിയുടെ ഏത് അന്വേഷണത്തോടും സഹകരിക്കുമെന്നും വ്യക്തമാക്കി.
രവി തേജയ്ക്ക് പിന്നാലെ സൂപ്പര് താരത്തിന്റെ സുഹൃത്തും സംവിധായകനുമായ പുരി ജഗനാഥിനെയും എസ്ഐടി ചോദ്യം ചെയ്യുന്നുണ്ട്. വ്യാഴാഴ്ച നടി മുമൈദ് ഖാനെയും മയക്കുമരുന്ന് കേസുമായി ബന്ധപ്പെട്ട് എസ്ഐടി ചോദ്യം ചെയ്തിരുന്നു.
പ്രതികരിക്കാൻ ഇവിടെ എഴുതുക: