മലയാളി ഹിന്ദുക്കളുടെ ക്ഷേത്രോത്സവങ്ങള്, പുരാണ-ഇതിഹാസ ഈശ്വരാവതാരകരുടെ ജന്മനാളുകള്, സ്വകുടുംബാംഗങ്ങളുടെ ജന്മനാളുകള് എന്നിവ സൂര്യരാശി ചക്രത്തിനെ ബന്ധപ്പെടുത്തിക്കൊണ്ടുള്ള മാസവും നക്ഷത്രവും അടിസ്ഥാനപ്പെടുത്തിയാണ് ആഘോഷിക്കുന്നത്.
ഇതിന്റെയടിസ്ഥാനത്തില്, ചിങ്ങമാസത്തിലെ രോഹിണി നക്ഷത്രവും കൃഷ്ണപക്ഷ അഷ്ടമി തിഥിയും ചേരുന്ന രാത്രിയെ കണക്കാക്കിയാണ് മലയാളി ഹിന്ദുക്കള് ഭഗവാന് ശ്രീകൃഷ്ണന്റെ ജയന്തിനാള് ശ്രീകൃഷ്ണ ജയന്തിയായി കൊണ്ടാടുന്നത്. ഈ വരുന്ന കൊല്ലവര്ഷം 1193 ലെ ശ്രീകൃഷ്ണജയന്തി, ചിങ്ങമാസം 27 (2017 സെപ്തംബര് 12) നാണ് മലയാളി ഹിന്ദുക്കള് അഷ്ടമി രോഹിണി പുണ്യദിനമായി കൊണ്ടാടുന്നത്.
എന്നാല്, മലയാളി-തമിഴ് ഹൈന്ദവേതര ഹിന്ദുക്കള് ചാന്ദ്ര സംവത്സരത്തെ അടിസ്ഥാനപ്പെടുത്തിയിട്ടുള്ള ശ്രാവണമാസ കൃഷ്ണപക്ഷ അഷ്ടമിതിഥിയെന്നാണ് ‘ജന്മാഷ്ടി/ഗോകുലാഷ്ടമി’ ആയി ആഘോഷിക്കുന്നത്.
ഇതിന്റെയടിസ്ഥാനത്തില് ഇവരിലെ ഒരു കൂട്ടര് 14/8/2017 രാത്രി 8 മണി മുതല് അഷ്ടമി തിഥിയാരംഭിക്കുന്നതിനാല് അന്നേദിവസം ജന്മാഷ്ടമിയായി ഭക്ത്യാദരേണ വൃതമെടുത്ത് ആഘോഷിച്ചു. വേറൊരു കൂട്ടര് 15/8/2017 പകല്വേളയില് അഷ്ടമിതിഥിയും രാത്രി രോഹിണി നാളുമായതിനാല് അന്നേദിവസം ഗോകുലാഷ്ടമിയായി ആഘോഷിച്ചു.
ശ്രാവണമാസത്തിന്റെ അടിസ്ഥാനത്തിലായാലും ചിങ്ങമാസത്തിലായാലും ഭാരതീയ ഹിന്ദുക്കള് ഭഗവാന് ശ്രീകൃഷ്ണന്റെ ജന്മനാള് ഭക്തിയോടെ ആഘോഷിക്കുന്നത് നാനാത്വത്തിലെ ഏകത്വത്തിന്റെ ഉത്തമ ഉദാഹരണമാണ്. ഹൈന്ദവ ധര്മ്മത്തിന്റെ ശ്രേഷ്ഠതയെ ഇത് വിളിച്ചോതുന്നു.
വാ. ലക്ഷ്മണപ്രഭു,
എറണാകുളം
പ്രതികരിക്കാൻ ഇവിടെ എഴുതുക: