പയ്യന്നൂര്: കണ്ടങ്കാളി പുഞ്ചക്കാട്ടെ 130 ഏക്കറോളം സ്ഥലത്ത് പെട്രോളിയം സംഭരണശാല സ്ഥാപിക്കാനുള്ള നീക്കത്തിനെതിരെ നെല്വയല് തണ്ണീര്ത്തട സംരക്ഷണസമിതിയുടെ ആഭിമുഖ്യത്തില് ഇന്ന് സമരപ്രഖ്യാപന കണ്വെന്ഷന് നടത്തും. കോടിക്കണക്കിന് ലിറ്റര് സംഭരണശേഷിയുള്ള വന്കിട പെട്രോളിയം സംഭരണ ശാലയാണ് ഏഴിമല നാവിക അക്കാദമിയുടെ സമീപം സ്ഥാപിക്കുന്നത്. പുഞ്ചക്കാട് റെയില്വേ ഗേറ്റ് മുതല് ചങ്കൂരിച്ചാല് പാലം വരെയുള്ള സ്ഥലങ്ങളിലാണ് ഇത് സ്ഥാപിക്കാനുദ്ദേശിക്കുന്നത്. വന്തോതില് സംഭരണശേഷിയുള്ള പെട്രോളിയം കേന്ദ്രം സ്ഥാപിക്കുന്നത് ഈ മേഖലയിലെ ജനങ്ങള്ക്കും ഏഴിമല നാവിക അക്കാദമിക്കും കടുത്ത ഭീഷണിയുയര്ത്തുമെന്നാണ് നാട്ടുകാരുടെ ആരോപണം. അപകടകാരികളായ കാഡ്മിയം, രസം എന്നീ പെട്രോളിയം മാലിന്യങ്ങള് സുരക്ഷിതമായി എവിടെ സംസ്കരിക്കുമെന്നോ ഇത്രയും പെട്രോളിയം ഉല്പ്പന്നങ്ങള് എങ്ങനെയാണ് ഇവിടെ എത്തിക്കുകയെന്നോ അധികൃതര് ഇതുവരെ വ്യക്തമാക്കിയിട്ടില്ല. കോസ്റ്റല് സോണില്പ്പെടുന്ന സ്ഥലത്തെ കണ്ടല്ക്കാട് വേലികെട്ടി സംരക്ഷിക്കാന് കഴിയാത്ത അവസ്ഥയാണ്. 15 കിലോമീറ്ററിനുള്ളിലെ സ്ഥാപനങ്ങളുടെ കണക്കെടുത്തപ്പോള് പദ്ധതി പ്രദേശത്തിന്റെ മൂന്നും നാലും കിലോമീറ്ററുകള്ക്കുളളില് പ്രവര്ത്തിക്കുന്ന സ്കൂളുകളും സ്ഥാപനങ്ങളും ഒഴിവാക്കി ഇവിടെ ജനവാസമില്ലെന്ന് വരുത്തിത്തീര്ക്കാനുള്ള ശ്രമമാണ് അധികൃതര് നടത്തിയിട്ടുള്ളത്.
ഇന്ന് ഉച്ചക്ക് 2 മണിക്ക് ഗാന്ധി പാര്ക്കില് നടക്കുന്ന സമരപ്രഖ്യാപന കണ്വെന്ഷന് പ്രമുഖ പരിസ്ഥിതി ശാസ്ത്രജ്ഞന് ഡോ.എസ്.ശങ്കര് ഉദ്ഘാടനം ചെയ്യും. ഡോ.അംബികാസുതന് മാങ്ങാട്, പ്രൊഫ.കുസുമം ജോസഫ്, പുരുഷന് എലൂര്, ജോണ് പെരുവന്താനം, വെലയോടി വേണുഗോപാലന്, ജയഘോഷ് പുതുവൈപ്പിന് തുടങ്ങിയവര് സംസാരിക്കും.
പ്രതികരിക്കാൻ ഇവിടെ എഴുതുക: